07 мая 2008 г.
Майăн 2-мĕшĕнче Питĕркассинчи “Спартак” стадионра футболла выляссипе Шупашкарти “СК Центр” ХАО генеральнăй директорĕн Г.Ивановăн Кубокне çĕнсе илессишĕн пысăк ăмăрту иртнĕ.
Спортсменсене район пуçлăхĕ А.И. Криков саламланă, вăйăра ăнăçу суннă. Сăмах май, асăннă строительство компанийĕн ертÿçи Хирлÿкассинче çуралса ÿснĕ, футбол вăййин чăн-чăн фаначĕ. Кăçал вăл районти футболистсене спонсорла пулăшу парса тăрать.
Асăннă кун Геннадий Анатольевич хăй тытса тăракан футбол командипе кĕрешĕве килнĕ. Ушкăн начальникĕ, Тралькасси ял тăрăхĕнче çуралса ÿснĕ Л.В.Мурайкин та тĕл пулăва хутшăннă.
Район спортсменĕсем Шупашкарти футболистсене хирĕç çивĕч кĕрешнĕ, анчах хăнасем ăнăçлă вылянă, хĕрлĕчутайсен хапхине мечĕк хыççăн мечĕк тапса кĕртнĕ, 5 : 1 шутпа çĕнтернĕ, кубока тивĕçнĕ.
Палăртмалла, майăн 11-мĕшĕнче Питĕркассинчи стадионра футболист-ветерансем хушшинче республикăра мала тухассишĕн черетлĕ ăмăрту иртмелле. Пĕрремĕш тĕл пулăва Шупашкарти “Нектар” команда килсе çитмелле.
Источник: "Пирěн пурнăç"