07 июля 2007 г.
Мучикассинчи çыхăну уйрăмĕнче тăрăшакан почтальонсем пурте тенĕ пекех хаçат-журнал çырăнтарас кампание хастар хутшăнаççĕ. Районти «Пирĕн пурнăç» хаçат тиражне ÿстерессипе те вăй хураççĕ. Акă, кăçалхи пĕрремĕш çур çулта кунти ĕçченсем ял халăхне район хаçатне 121 экземпляр çырăнтарнă. Иккĕмĕш çур çуллăх тиражĕ те вĕсен ÿснĕ - пурĕ 140. Уйрăмах район хаçатне сарассишĕн Кив Ирчемесри Таня Белова чунтан тăрăшать. Çамрăк почтальон урлă районти ĕç-хĕле çутатакан хаçата 31 çын çырăнма кăмăл тунă. Т.Белова почта ĕçĕнче çĕнĕ çын мар, ĕç стажĕ пысăках мар пулин те, пуян опытлă теес килет. Çулсерен вăл хаçат çырăнтарассипе малти вырăнта тăрать. Кив Ирчемес халăхне вăхăтра хаçатпа тивĕçтерессине хăйĕн ĕçĕнче тĕпе хурать. Икĕ кустăрмаллă велосипечĕпе куллен Мучикассинчи çыхăну уйрăмне тытать, тулли сумкăна хул пуççи урлă ярса чунĕпе суйласа илнĕ ĕçе тивĕçлĕн пурнăçлама васкать. Кив Ирчемесрен Мучикассине тухмалли çул кайса килессипе 14 километра тăсăлни çамрăк почтальоншăн йывăрлăх мар. Тĕрĕссипе, хĕллехи çил-тăвăллă çанталăкра утасси хĕнрех. Апла пулин те Татьяна Белова ÿркенмест.
Çак çыхăну уйрăмĕнче тăрăшакан, Мучикасси ял çыннисене хаçат валеçекен Надежда Горшкова та хăйĕн ĕçне яваплăха туйса пурнăçлать.
- Çынсем юлашки вăхăтра «Пирĕн пурнăç» хаçата нумайтарах çырăнма пуçларĕç. Хаçатра хăйсем палланă çынсем çинчен çырнине курсан савăнаççĕ. Район хыпарне пĕлме ытларах аслă ăру çыннисем тăрăшаççĕ. Ку тăрăхри интеллигенци те ку утăмран аякра тăмасть. Ял халăхĕпе килĕштерсе ĕçлетĕп, - тет Н.Горшкова.
10 çул ытла ĕнтĕ почта ĕçĕнче тимлекен Надежда ку ĕçĕн пĕтĕм кăткăслăхĕпе вăрттăнлăхне алла илнĕ. Почта ĕçченĕ пулмах вăл çуралнă.
Кунти уйрăмра тимлекен Г.Куропаткина, З.Горшкова, П.Петров почтальонсем те ырă сăмахсене тивĕç. Почтальонсене пĕр тĕвве пĕрлештерсе вĕсен ĕçне йĕркелесе пыракан Мучикассинчи çыхăну уйрăмĕн заведующийĕ Е.Куропаткина ĕçченсен хастарлăхĕпе кăмăллă.
Источник: "Пирěн пурнăç"