08 ноября 2008 г.
Районти шалти ĕçсен пайĕн участок инспекторĕнче хĕрарăм ĕçлени ку таранччен пулман. Акă, кăçалхи октябрĕн 22-мĕшĕнчен пуçласа Тралькасси ял тăрăхĕн участок уполномоченнăйĕ пулса ĕçлеме Марина Валерьевна Альгешкинана шаннă.
Сăмах май, М.В.Альгешкина йĕрке хуралĕнче 2003 çултанпа тăрăшать. Вăл районти шалти ĕçсен пайĕнче административлă практика инспекторĕ пулса тимленĕ. Службăра тăнă май, Марина Валерьевна шырав вăрттăнлăхне аван пĕлет. Преступленисене уçса парас ĕçе те хутшăннă.
Инспектор ĕçленĕ хушăрах Чул хула академийĕн Шупашкарти филиалĕнче пĕлĕвне ÿстерет. Халĕ вăл 6 курс студентки.
Марина Валерьевна участок инспекторĕн ĕçĕ çăмăл маррине аван пĕлет. Апла пулин те вăл участок уполномоченнăйĕ пулса ĕçлеме килĕшнĕ. Халĕ Тралькасси тăрăхĕнчи çынсен канлĕхне сыхлассишĕн, обществăлла вырăнсенче, урамсенче лăпкăлăх хуçалантăр тесе тăрăшать. Кунта вара чăтăмлăх, тÿсĕмлĕх, çирĕп кăмăл çителĕклех кирлĕ. Турри хĕрарăма çак енсене пĕтĕмпех панă. Марина Валерьевна çак тивĕçе чыслăн пурнăçласса шанатпăр.
Источник: "Пирěн пурнăç"