Кăçалхи юпа уйăхĕн 6-мĕшĕнче ку çемье кĕмĕл туйне — пĕрлешнĕренпе 25 çул çитнине — паллă тума хатĕрленет. Туслă, шăкăл-шăкăл калаçса, пĕр-пĕрне çур сăмахранах ăнланса пурăнаççĕ вĕсем. Çавăнпах кил-çуртри, хуçалăхри ĕç-пуçа та çийĕнчех ăнтараççĕ. Çу кунĕсенче пахча-анкартири ĕçсен калăпăшĕ самаях ÿсет пулсан та, пур пĕр маххă памаççĕ Ивановсем. Кил хуçи ав электричество хуçалăхĕ енĕпе те маçтăр.

Венера Петровна — карайсем, Чатукасси шкулĕнче 26 çул ĕнтĕ химипе биологине тата географине вĕрентет. “Шкул лесничестви” кружок ертÿçи те вăлах. Чатукасси тăрăхĕнчи çамрăк вăрманçăсем Венера Петровна йĕркелесе-вĕрентсе пынипе çулленех районти тата республикăри конкурссенче малти вырăнсене тивĕçеççĕ. Маттурсем! Шкул ачисене крючокпа çыхма та хăнăхтарать педагог.

Ывăлĕсем — Андрейпа Артемий та акă ĕçе юратса çитĕнчĕç, ятарлă вăтам пĕлÿ илчĕç, ашшĕ çулĕпех кайрĕç. Кĕçĕнни — Артемий — халĕ Раççей çарĕнче хĕсметре тăрать. Ырă кăмăллăх та вĕресе-тапса тăрать Ивановсенче. Çемье канашĕнче вĕсем хĕр ачана усрава илме калаçса килĕшрĕç. Надежда кăçал 8-мĕш класран вĕренсе тухрĕ. Музыкăна çав тери кăмăллать.

Ивановсем вĕлле хурчĕсем те тытаççĕ, кроликсем ĕрчетеççĕ, 2-шер ĕнепе пăру усраççĕ. Килти ĕçсене ăнтарма трактор та, УАЗ автомашина та пур.

Вĕсем “Çулталăкри çемье-2011” районти конкурса та хутшăнчĕç, “Социаллă яваплăхлă çемье” номинацире çĕнтерÿçĕсем пулса тăчĕç.