09 июня 2021 г.
Пикшикри вулавăшра библиотека кунне паллă турĕç. Вулавăш ертÿçи Надежда Спиридонова хăйĕн ĕçĕпе паллаштарчĕ. Çак куна 1995 çултанпа паллă тăваççĕ.
Библиотекăра 10 пин кĕнеке упранать, вулакансен йышĕ — 400-е яхăн. Çамрăксем кăна мар, пенсионерсем те юратсах çÿреççĕ, вырăс тата чăваш писателĕсем çырнă кĕнекесемпе ытларах кăсăкланаççĕ. Уйрăмах кунта Светлана Тарасова, Ираида Исакова, Римма Зайцева /Пикшик/, Татьяна Павловăпа Валя Соловьева /Çĕньял Шетмĕ/ час-часах пулаççĕ. Вĕсем — библиотекăн çывăх тусĕсем.
Çуллахи вăхăтра ял ачисем кăна мар, Шупашкар тата Мускав хулисенчен çуллахи каникула аслашшĕ-асламăшĕ патне канма килнĕ шкул ачисем те час-часах килеççĕ. Библиотекарь каланă тăрăх, Мария Юхтарова, Еллинăпа Михаил Спиридоновсем /Шупашкар/, Екатеринăпа Елизавета Чаруйскаясем /Мускав/ кĕске вăхăтрах нумай кĕнеке вулама ĕлкĕреççĕ.
Лев СОЛОВЬЕВ.
Источник: "Ял пурнăçĕ" (Красноармейская районная газета)