16 июля 2013 г.
Ăна, кĕске сăмах каласа, Алманч ял тăрăхăн пуçлăхĕ В. Долгов уçрĕ, район хаçачĕн тĕп редакторне И. Прокопьева сăмах пачĕ. Иван Афанасьевич пухăннисене хаçат редакцийĕн ĕçĕ-хĕлĕпе, райхаçата кăçалхи иккĕмĕш çур çул валли Супарти çыхăну уйрăмĕнче, вăл шутра Нимĕчкассипе Вăрманкас Алманч ялĕсенче, епле сарнипе паллаштарчĕ. Шел пулин те, кăтартусем ку енĕпе тивĕçтереймеççĕ-ха. Акă çыхăну уйрăмне райхаçата 125 экземпляр сарма задани çитернĕ, 83 çырăнтарнă, ку заданипе пăхнин 66, 4 проценчĕ кăна. Нимĕчкассисемпе вăрманкасалманчсен те вăл кăтартусем пысăк мар. Райхаçатăн тĕп редакторĕ нимĕчкассисене ку енĕпе юлса пынине пĕтерме чĕнчĕ, çитес тапхăрта ял çыннисем район хыпарçиллĕ пуласса шаннине пĕлтерчĕ.
Тĕл пулура ял ыйтăвĕсем пирки те тĕплĕ калаçу пулса иртрĕ. (Кусем пирки райхаçат редакцине Е. Макарова та çырса пĕлтерчĕ, ку çырăва тĕл пулура сÿтсе яврĕç). Акă ял çыннисемпе пухăнса калаçма, ытти мероприятисем ирттерме ятарлă вырăн çук. Тĕл пулура “Гигант” хуçалăхăн ферма территорийĕнчи пушă çуртне ку тĕллевпе усă курма пулмасть-ши тесе ыйту лартрĕç. “Лесная” урам вĕçĕнче çăл тăвасси ыйтуллă, ăна татса парассине кам та пулин хăй çине илекен тупăнĕ-ши? Ял витĕр хытă сийлĕ çул хывни лайăх, анчах “Лесная” урамра ăна туса пĕтермен-ха, çавна май çурхи шыв ун тăрăхах юхнă. Çăва валли çĕр уйăрас ыйту çивĕч тăрать.
Хаçат кунĕнче “Ял пурнăçне” çуллен активлă çырăнакансене парнесемпе чысларĕç. Редакци çумĕнчи агитушкăн ял çыннисене савăк юрăсемпе савăнтарчĕ.
И. Прокопьев