05 апреля 2012 г.
Юрă хайласси çăмăл ĕç мар. Кунта кăмăл туртăмĕсĕр пуçне турă пани те кирлĕ. Трак тăрăхĕнче музыка шур сухалĕсен йышĕ унчченех пĕчĕк пулман: Н. Чернышев-Шетмĕ, К. Архипов, Н. Григорьев, М. Ильин… Каярахпа унта И. Степанов, В. Романов, Ю. Шепилов, Н. Филимонов, В. Никандров тата ыттисем хушăннă. Юлашки теçетке ытла çул хушшинче кунашкаллисен йышĕ чылай ÿсрĕ. Çакă та районта “Шетмĕпе Çавал кĕввисем” фестиваль йĕркелесе яма май пачĕ. Каярахпа вăл республика таран çĕкленчĕ.
Мартăн 29-мĕшĕнче Красноармейскинчи ял тăрăхĕсен хушшинчи информаципе культура центрĕнче çакăн пек 15-мĕш фестиваль иртрĕ.
Фестивале район администрацийĕн пуçлăхĕ А. Шестаков уçрĕ. Чăваш Республикин композиторĕсен ассоциацийĕн президенчĕ Н. Зимин, районти Н. Янкас ячĕллĕ пĕрлĕх председателĕ Г. Ефимов салам сăмахĕсем каларĕç.
Уяв концертне районти хут купăсçăсен “Хавал” ансамблĕ чăвашсен çĕкленÿллĕ çеммисемпе пуçларĕ.
Концертра тĕрлĕ юрăсем янăрарĕç. Хăй тĕллĕн вĕреннĕ 18 композиторпа 12 сăвăçăн. Çав композиторсенчен 12-шĕ пирĕн районтан: Н. Никоноров, Н. Филимонов, В. Рудникова, И. Степанов, О. Николаев, И. Прокопьев, С. Гаврилов, Г. Алексеев, Ю. Романов, В. Никитин, Ю. Шепилов, В. Романов. Юрăсене шăрантарнă художество пултарулăх йышĕсем — Красноармейскинчи информаципе культура центрĕ çумĕнчи “Трак ен” халăх фольклор ансамблĕ (ертÿçи Н. Никоноров), кунти ветерансен хорĕ (ертÿçи Чăваш Республикин тава тивĕçлĕ ĕçченĕ А. Алексеев), “Заволжский” клуб çумĕнчи халăх хорĕ (ертÿçи М. Дмитриев), хĕрарăмсен “Упи ен” фольклор (Упи), “Карай ен” (Карай), “Каприз” (Заволжски клуб), “Çăлкуç” (Кĕçĕн Шетмĕ), “Чатук ен” (Чатукасси), “Шурăмпуç” (Мăн Шетмĕ) ансамбльсем, уйрăм юрăçсем Г. Яковлев, Л. Егорова, З. Смирнова. Фестивале пĕтĕмпе 4 районти (Красноармейски, Çĕрпÿ, Канна, Элĕк) пултарулăх йышĕсем хутшăнчĕç. Сцена çине 150 çынна яхăн тухса пултарулăхне кăтартрĕ.
Янăранă юрăсен авторĕсене, композиторсемпе сăвăçсене, фестиваль дипломĕсемпе чысларĕç. Чылай художество пултарулăх йышĕсемпе уйрăм солистсем те тĕрлĕ номинацисенче дипломсен хуçисем пулса тăчĕç.
Фестивале Чăваш халăх артисчĕ И. Христофоров та хутшăнчĕ. Шупашкар хăни В. Романовпа И. Прокопьев кĕвĕленĕ юрăсене шăрантарчĕ.
Источник: "Ял пурнăçĕ" (Красноармейская районная газета)