Публикации » Тăван ялăм, Нимĕчкасси

Манăн тăван яла Нимĕчкасси теççĕ. Çак ят пĕлтерĕшне эпĕ ваттисенчен ыйтса пăхрăм. Вĕсем каланă тăрăх, ял Нимĕч ятлă чăваш çынни ячĕпе пулса кайнă.

Ял тавралла пысăках мар ултă пĕвене курма пулать. Йĕри -тавра татах ялсем пур, вăрман та аякрах мар. Вăрманта темĕн тĕрлĕ йывăç та ÿсет. Çулла унта тĕрлĕ кайăксем çав тери çепĕç те хитре сассисемпе тĕрлĕрен илемлĕ кĕвĕсем шăрантарнине итлеме пулать. Вăрманпа юнашарах пысăк уй сарăлса выртать. Унта тыр-пул тинĕс пек кашласа ларать. Тавралла пăхса илен те кăмăл çĕкленет. Епле илемлĕ пирĕн тавралăх.

Мана уйрăмах çуркуннепе çулла килĕшеççĕ. Ун чухне йывăçсем хăйсен симĕс тумĕсене тăхăнаççĕ, урамсенче ешĕл курăк шăтса тухать. Пĕтĕм тавралăх чĕрĕлет тейĕн.

Манăн тăван ял яланах хитре: çулла та, хĕлле те, çуркунне те, кĕркунне те. Тăван çĕртен, çуралнă тăван вырăнтан хакли урăх нимĕн те çук.