25 августа 2007 г.
Ачасем - пирĕн пуласлăх. Вĕсене тĕрĕс воспитани парса, ачашласа пăхса ỹстересси ашшĕ-амăшĕн тивĕçĕ. Варта тĕвĕленнĕ, 9 уйăх чĕре айĕнче йăтса çỹресе кун çути парнеленĕ ачана тепĕр чухне пăхмаççĕ, пăрахаççĕ. Çакнашкал йывăр лару-тăрăва кĕрсе ỹкнĕ пĕчĕк чунсем валли - ача çурчĕ е интернат чăн-чăн çăлăнăç. Анчах та ашшĕ-амăшĕн ăшши ачасене çитмест. Мĕнле лайăх пулсан та вĕсем ашшĕ-амăшĕсемшĕн тунсăхлаççĕ. Çак пĕчĕкскерсене хăйсен хỹттине илекенсем те йышлă. Вĕсем тăван ашшĕ-амăшĕ пекех пăхаççĕ. Ачасене юратакан, çепĕç чун-чĕреллĕ çынсем пирĕн районта та пур. Чăваш Эльпуçĕнче пурăнакан Светланăпа Павел Долговсем 4 çулхи Максима 2003 çулта усрава илнĕ. Халĕ вара 6 уйăхри Полина вĕсен хĕрĕ пулса тăнă. Мĕнле телейлĕ ывăлпа хĕр, тинех вĕсем ашшĕ-амăшĕн хỹттинче. Кунта вĕсене юратаççĕ, çупăрлаççĕ. Долговсен çемйине телей, юрату, ăнăçу сунатпăр.
Источник: "Каçал Ен"