12 июля 2007 г.
Комсомольски районĕнчи Тутар Элпуçĕнчи Идрисовсен килне почтальонка эрнере пилĕк хутчен тутарла мар, чăвашла тухакан «Хыпар» хаçата килсе панинчен кÿршĕсем тĕлĕнме пăрахнă ĕнтĕ. Вĕсем ăна халĕ кăна мар, ĕлĕк «Коммунизм ялавĕ» ятпа çÿренĕ чухне те çырăнса тăнă.
- Эпир «Хыпара» юратса вулатпăр, вăл çитессе чунран кĕтетпĕр, - теççĕ Минибану аппапа Миназабый сăмса çине утлантарнă куçлăх витĕр пăхса хаçата унталла-кунталла саркаланă май. – Питĕ килĕшет вăл пире. Кашни статйине тишкерсе тухатпăр…
Çитмĕл çиччĕре пыракан кил хуçи çамрăк чухне пĕрремĕш класран пуçласа çиччĕмĕш таранах чăваш шкулĕнче чăвашла вĕреннĕ. Çавăнпа вулама та, çырма та аван пĕлĕт. Калаçасси пирки асăнмастпăр та. Мăшăрĕ те, кÿршĕре Хирти Явăш тата Чăваш Элпуç ялĕсенче пурăнакансемпе туслă пулнăран, чăваш чĕлхине упăшкинчен кая мар чухлать. Çавăнпа чăваш халăх хаçатне хисеплеççĕ те. Пирĕн те хамăрăн хаçата хисеплесе ытларах çырăнма тăрăшсан питĕ аван пулмалла.
Источник: "Хыпар"