21 июля 2017 г.
Сăмахăм Хирти Выçли ялĕнче нумай ачаллă хресчен çемйинче çуралса ỹснĕ Ольга Георгиевна Фуражкина çинчен пулĕ.
Хирти Явăш вăтам шкулне пĕтернĕ хыççăн хĕр Свердловск облаçĕнчи Алапаевск хулинчи медицина училищине вĕренме кĕнĕ. 1983 çулта авăн уйăхĕнче районти тĕп больницăн хирурги уйрăмĕнче медсестрара ĕçлеме пикеннĕ. Хĕр хулара юлас темен. Оля хăй çуралса ỹснĕ ялтах тĕпленме шут тытнă. Хирти Выçли каччипе Анатолийпе 1985 çулта çемье çавăраççĕ. Пĕр-пĕрне савакан икĕ чĕре ывăлпа хĕре кун çути кăтартаççĕ. Ывăлĕ Вячеслав халĕ çемйипе Шупашкар хулинче тĕпленнĕ. Вĕсем мăшăрĕпе ывăл çитĕнтереççĕ.
Сăмах май, Света хĕрĕ амăшĕн çулне суйласа илнĕ. Халĕ Мускав хулинче медсестрара ĕçлет.
Ольга Георгиевна мăшăрĕпе 32 çул пĕр-пĕрне юратса тата хисеплесе пурăннă. Шел пулин те, Анатолий Вячеславович чире пула вăхăтсăр çĕре кĕчĕ.
Ольга Георгиевна районти тĕп больницăра хирурги уйрăмĕнче 21 çул ĕçленĕ. Ун хыççăн апат пĕçерекен çĕре диетолог-сестрана куçнă. Çав вырăнта вăл 13 çул вăй хурать.
34 çул хушшинче маттур хĕрарăм нумай Хисеп грамотине тивĕçнĕ. Вăл хăйĕн ĕçне юратать, çавăнпа та тĕплĕн пурнăçлать. Ăна коллективра питĕ хисеплеççĕ, юратаççĕ.
Ольга Георгиевнăна ял çинче те хисеплеççĕ. Вăл çынсене яланах пулăшма хатĕр. Малашне те эпир ăна ырлăх-сывлăх, ĕçре ăнăçу сунатпăр.
А.РОЗОВА
Источник: "Каçал Ен"