18 апреля 2017 г.
Çуркунне çитсен юр кайса пынăçемĕн куç умне симĕс курăкпа пĕрлех тасамарлăх та тухать. Чуна ыраттаракан тирпейсĕрлĕх кăмăла хуçать. Хĕл каçа хамăрах пăрахса хăварнă ĕнтĕ çак ăпăр-тапăра, апла пулсан халĕ хамăрăнах ăна пуçтармалла.
Район территорийĕнче тирпей-илем кĕртес тĕллевпе райадминистраци пуçлăхĕн Алексей Самаркинăн кăçалхи март уйăхĕнчи йышăнăвĕпе апрелĕн 3-мĕшĕнчен пуçласа майăн 29-мĕшĕччен экологи икуйăхлăхне ирттерме палăртнă. Çак хушăра хамăр пурăнакан вырăна, ял масарĕсене тасатса тирпейлемелле. Акци вăхăтĕнче ирттерме палăртнă чи пĕрремĕш субботник апрелĕн 14-мĕшĕнче иртрĕ. Çак кун район администрацийĕнче, организацисемпе предприятисенче, суту-илỹ точкисенче тăрăшакансем пурте харăс урама тухса çỹп-çап пуçтарчĕç, шăлса тасатрĕç. Унпа пĕрлех ял тăрăхĕсенче пурăнакансем те айккинче юлмарĕç. Кашниех урама тухса ĕçлерĕ. Халĕ таврара тирпей-илем хуçаланать. Апла пулин те субботник кунĕсем малашне те пулĕç-ха. Йывăçсем лартса хăвармалла. Çанталăк ăшăтсанах хитре чечексем акăпăр, лартăпăр. Пурăнакан вырăнта яланах хитре те тирпейлĕ пултăр.
Дмитрий ГАЛКИН,
райадминистрацин ятарлă программăсен пайĕн начальникĕ:
- Кашниех халĕ кунсерен хĕвел пăхнипе усă курса кил умне, территорисене тирпейлеме тăрăшать. Тасатни питĕ лайăх, анчах та çỹп-çапа çиллĕ çанталăкра тата çурт, тĕрлĕ хуралтă çывăхĕнче çунтармалла мар. Çак ансат йĕркене пăхăнманни пысăк инкек патне илсе çитерме пултарать. Çунакан çỹп-çап куписене, вĕсем çывăхра мар пулсан та, тимлĕхсĕр хăварма юрамасть. Кỹршĕсем хăйсем тирпейленĕ хыççăн чĕртнĕ çỹп-çап куписене пăхса тăманнине курсан вĕсене асăрхаттарăр. Типĕ курăкпа та асăрхануллă пулмалла. Çулсеренех уйсенче курăк çуннă тĕслĕх сахал мар. Çỹп-çап купине тивертрĕр пулсассăн ăна çунса пĕтичченех тимлĕ пăхса тăрăр.
А.ЕФРЕМОВА
Источник: "Каçал Ен"