19 января 2016 г.
Иртнĕ эрнере Хирти Явăшра пурăнакан хисеплĕ ватăсенчен пĕри, ĕç ветеранĕ, тыл ĕçченĕ Мария Ивановна Орлова 90 çулхи юбилейне паллă турĕ.
Мария Ивановна пурнăçри йывăрлăхсене парăнтарса, çутă малашлăх пирки ĕмĕтленсе пурăннă, юратнă, ĕçленĕ. Пурнăçĕ çăмăлах килмен пулсан та 7 ача ỹстернĕ. Халĕ 12 мăнукĕпе тата вĕсен 10 ачипе киленсе пурăнать.
90 çулхи юбилей ячĕпе Мария Ивановнăна район администрацийĕн капиталлă строительствăпа çурт-йĕр, коммуналлă хуçалăх пайĕн начальникĕ Александр Краснов саламланă. Вăл юбиляра Раççей Федерацийĕн Президенчĕн Владимир Путинăн открыткине, Комсомольски район администрацийĕн парнине панă.
Çавăнпа пĕрлех Мария Ивановнăна Элпуç ял тăрăхĕн пуçлăхĕ Владимир Гордеев тата вырăнти культура çурчĕн пултарулăх коллективĕ саламланă, çепĕç юрăсем шăрантарнă.
Источник: "Каçал Ен"