19 декабря 2015 г.
Тĕлĕнмелле маттур та чăтăмлă çын вăл Маюк аппа. Мĕн ачаран ĕçре пиçĕхсе ỹснĕскер, пĕр самант та пушă ларма хăнăхман. Палăртнă ĕçе яланах вăхăтра пурнăçлать. Ачисемпе мăнукĕсене те çакнах вĕрентсе ỹстерет.
Мария Мироновна Павлова - Хирти Явăшра пурăнакан хисеплĕ ватăсенчен пĕри. Ачалăхĕ те, çамрăклăхĕ те çăмăл килмен Маюкăн. Аслă Отечественнăй вăрçă пуçлансанах ашшĕпе тетĕшĕ фронта тухса кайнă. Амăшĕ пилĕк ачипе пĕчченех тăрса юлнă. Иртнĕ вăхăта аса илсе Маюк аппа ассăн сывлать.
- Чи çывăх çыннăмăрсем вăрçă хирĕнчен таврăнаймарĕç. Аннене çав тери йывăр пулчĕ. Ачисене ура çине тăратмалла, тăрантармалла, тумлантармалла. Аннене пулăшас тесе кашниех ĕçлеме тăрăшаттăмăр, торф кăларма та пĕрре кăна мар кайнă. Пуçа усса ĕсĕклесе ларман, çутă малашлăх пирки ĕмĕтленнĕ, - каласа парать Маюк аппа.
Хирти Выçли хĕрĕ кỹршĕ яла - Хирти Явăша - качча тухнă. Мăшăрĕпе 7 ача çуратса ỹстернĕ, тивĕçлĕ воспитани панă. Пурте çемьеленсе тĕрлĕ çĕрте тĕпленнĕ.
- Ачасем тăван киле пуçтарăнсан чунтан хĕпĕртетĕп. Час-часах килсе çỹреймен чухне телефонпа шăнкăравлаççĕ. Халĕ пурнăç условийĕсем ĕлĕкхипе танлаштарсассăн пин хут лайăхрах. Çамрăкла кун пек пурнăç пирки ĕмĕтленме те пултарайман. Килте ăшă, шывĕ кĕрет те тухать, лавккасенче апат-çимĕçĕ çителĕклĕ. Савăнса çеç пурăнмалла, - тет кинемей.
Маюк аппа çак кунсенче 85 çул тултарчĕ. Çулĕсене кура мар хастар вăл. Пушă вăхăтра алă ĕçĕ тума юратать. Çулла кил-картишĕнче, пахчара тăрмашать. Мăнукĕсене пур ĕçе те явăçтарать.
- Ачасене мĕн пĕчĕкрен пĕрле ĕçлеттермелле, вĕрентсе пымалла, - терĕ ăс парса ватă.
О.ВАЛЕНТИНОВА
Источник: "Каçал Ен"