10 июля 2013 г.
Хирти Выçли ялĕнче çуралса ÿснĕ, халĕ Комсомольскинче пурăнакан Елена Семеновна Розова июлĕн 6-мĕшĕнче 90 çул тултарнă. Ăна юбилейпе саламлама район администрацийĕн социаллă хÿтлĕх пайĕн начальникĕ Ираида Никитина тата Комсомольски ял тăрăхĕн специалисчĕ Елена Атласкина пынă. Ираида Алексеевна юбиляра асăнмалăх парне тата РФ Президенчĕн Владимир Путинăн саламлă открыткине панă. Унта çапла çырнă: «Аслă Отечественнăй вăрçа чăтса ирттернисем, тылра ырми-канми ĕçленисем, вăрçă хыççăнхи çулсенче çĕр-шыва ишĕлчĕксенчен çĕнĕрен çĕкленисем чăннипех те пирĕн тимлĕхе, хисепе, тав сăмахĕсене тивĕç».
Елена Семеновна 1923 çулхи июлĕн 6-мĕшĕнче Хирти Выçли ялĕнче çуралнă. Хăйĕн ĕмĕрĕнче унăн тем те чăтса ирттерме тивнĕ: вăрçă асапне, выçлăха, çывăх çыннисен çухатăвне.
Пурнăçне Елена Розова ял хуçалăхĕпе çыхăнтарнă. Вăл — тыл ĕçченĕ. Мăшăрĕпе вĕсем 5 ачана кун çути парнеленĕ, ура çине тăратнă. Халĕ юбилярăн 10 мăнукпа вĕсен 7 ачи. Паянхи кун Елена Семеновна Галина хĕрĕн çемйипе пурăнать.
Источник: "Каçал Ен"