Публикации » Уявра савăнчĕç

Нарăс уйăхĕн 23-мĕшĕ — Çĕршыв хÿтĕлевçисен кунĕ. Хирти Явăшри «Йăвача» ача садĕнче çак куна çулсеренех паллă тăваççĕ. Кăçал та ăна уявлама ачасен ашшĕсене йыхравларăмăр. Малтанах шăпăрлансем хăнасене саламласа сăвă, юрă-ташă парнелерĕç. Ун хыççăн ачасемпе ашшĕсем икĕ ушкăна пайланса вăйă вылярĕç. Пуçланчĕ вара хĕрÿ тупăшу. Ашшĕсем те, ачасем те пĕр-пĕрне парăнасшăн пулмарĕç. Вĕсем тĕрлĕ йывăрлăхсем витĕр тухса хăйсен ăсталăхне, пултарулăхне тĕрĕслерĕç. Связистсем те пулчĕç, «штаб çырăвне» те вăхăтра çитерчĕç, «урхамахсемпе» те çил пек вĕçтермелле пулчĕ. Уявра тупăшакансене Тухатмăшпа Арçури хавхалантарса пычĕç. Вăйăра икĕ команда та маттур пулчĕ.

Хаваслă уява Д.Садртдиновăпа М.Долгов «Атте пек юлташ çук çĕр çинче» юрăпа вĕçлерĕç. Ачасем ашшĕсене хăйсем ăсталанă парнесемпе савăнтарчĕç.