Публикации » Паттăрсене халалласа

Хирти Явăшра хĕсметре çар тивĕçне пурнăçласа пуçĕсене хунă салтаксене халалласа кашни çулах мини-футбол турнирĕ ирттереççĕ. Çак сăваплă та пархатарлă ĕç пуçаруçи — Ремис Мансуров. Кăçал турнир çирĕммĕш хут пулчĕ.

Январĕн 10-мĕшĕнче Ф.Тазетдинов, И.Гаврилов тата Р.Гафуров салтаксен çутă сăнарĕсене аса илсе ăмăрту иртрĕ. Унта Канаш, Патăрьел, Шăмăршă районĕсенчи тата Çĕнĕ Шупашкарти футболистсем килсе çитрĕç. Район пуçлăхĕ Геннадий Волков, район администрацийĕн ял хуçалăх пайĕн начальникĕ Георгий Киргизов, Чăваш Енри афганецсен союзĕн председателĕ Геннадий Матвеев, Элпуç ял поселенийĕн пуçлăхĕ Николай Носов, Афган вăрçин ветеранĕсем Виктор Гаврилов, Илья Сизов тата ыттисем те тухса калаçрĕç. Вăйă умĕн «Дружба» ЯХПК ертÿçине Ремис Мансурова çитĕнекен ăрăва патриотизмла воспитани, спорта явăçтарас ĕçри çитĕнÿсем тунăшăн «Совет çарĕсене Афган çĕрĕ çинчен кăларнăранпа — 15 çул» юбилей медалĕ парса чысларĕç.

Хирти Явăшри тĕп шкулта «Время выбрало нас» стенд хатĕрленĕ. Унта çар тивĕçĕсене пурнăçласа пуçĕсене хунă салтаксен пурнăçĕпе паллашма май пулчĕ. «Хĕсметре тăрса пуçĕсене хунă ентешсене пурне те асăнса йĕркелерĕмĕр ăна»,— терĕ мана Николай Ильин директор, стенда кăтартнă май.

Хĕрÿ тупăшура 10 команда вăй виçрĕ. РФ Перекет банкĕн Патăрьелĕнчи 4440 номерлĕ уйрăмĕн ĕçченĕсем пĕрремĕш вырăна тухрĕç. Иккĕмĕшсем Патăрьелĕнчи Çĕнĕ Катек, виççĕмĕшсем Шăмăршă районĕнчи «Тайфун» команда спортсменĕсем пулчĕç. «Чи лайăх тапăнса вылякан» ята Александр Анисимов (Патăрьел) тивĕçрĕ. Çĕнтерÿçĕсене Хисеп грамотисем, хаклă парнесем парса чысларĕç.

«Ремис Мансурович пире, ватăсене, тăтăшах пулăшу парать. Ывăлсене манманшăн, вĕсен сăнарĕсене чĕрере упранăшăн тав тăватпăр»,— пĕлтерчĕç паттăрсен амăшĕсем А.Гавриловăпа Р.Гафурова.

Турнира ирттерме «Дружба» ял хуçалăх производство кооперативĕ, «Слава картофелю» агрофирмăн» президенчĕ Александр Капитонов, Элпуç ял поселенийĕн администрацийĕ укçа-тенкĕ парса пулăшнă.