06 мая 2014 г.
Кунерти информаципе культура центрĕнче районти пултарулăх ушкăнĕсен йăлана кĕнĕ смотр-конкурсĕ иртрĕ, унта Кунерсем те хутшăнчĕс. Вĕсем шăрантарнă «Алран кайми аки –сухи», «Çĕмĕрт çеçки çурăлсан» тата ытти юрра халăх хапăлласа йышăнчĕ. «Пикеçĕм» ансамбль солисчĕсем Любовь Федорова, Эльвира Строгина, Нина Родионова, Анна Львова, Галина Кашаева, Нина Перова, Елена Антипова, Тамара Соловьева пултарулăхне те çынсем тивĕçлипе хакларĕс. Любовь тата Борис Федоровсем юрланă «Çĕçпĕл чечексем», ялти пĕтĕмĕшле пĕлÿ паракан шкулти «Мерчен» ушкăнăн чăваш, вырăс ташшисем ентешсен кăмăлне çĕклерĕç. Концерт Кунер ял тăрăхĕнчи юрă – ташă ăстисем, вырăнти артистсем пултарулăхра çитĕнÿ тунине çирĕплетрĕ. Кунта, паллах, центр ертÿçин, Чăваш Республикин культурăн тава тивĕçлĕ ĕçченĕн Борис Федоровăн тÿпи те пур. Вырăнти хăй тытăмлăх администрацийĕн пуçлăхĕ Валерий Юсов çакна уйрăммăн палăртса ăна Тав хучĕпе чысларĕ.
Источник: "Хыпар"