02 июня 2017 г.
Патăрьел районĕнчи Çĕнĕ Ахпÿрт ялĕнчи Евгений Мартышкин хресчен-фермер хуçалăхĕн ĕç-хĕлĕпе 5 çул каялла паллашнăччĕ. Халĕ ХФХ епле аталанать-ха? Ака акма пĕлтĕр ака уйăхĕн 18-мĕшĕнче тухнăччĕ, — терĕ Евгений Михайлович. — Кăçал пĕрремĕш йăрансене 10 кун каярах юлса варăнтартăмăр. Пурĕ 15 гектар çинче пăхса çитĕнтеретпĕр.
Севок вăрлăхĕ паха, Сербирен илсе килнĕ. Шăтаслăхĕ питĕ лайăх — 97%. Культурăна 10 гектар çинче шăваратпăр.
Пăла шывĕ хĕрринчи лаптăкра сип-симĕс сухан речĕсем çĕршер.Вĕсен хушшинчи хура тăпра çинче çум курăк пач çук.
— Ăна пĕтерес тесе чернушка акнă хыççăн 10 кун хушшинче химии препарачĕ сапса тухрăмăр, — ăнлантарчĕ фермер. — Çавăнпа шăтмарĕ. Çум курăк каярахпа пур-пĕр шăтать. Унпа кĕрешме тиветех.
Кăçал тăпрара нÿрĕк çителĕклĕ. Çакна шута илсе культурăна иртнĕ çулхинчен каярах — çу уйăхĕн 20-мĕшĕнче — шăварма пуçланă.
Е.Мартышкин Çĕнĕ Ахпÿрт ял тăрăхĕнчи иртнĕ çулсенче усă курман 82 гектар çĕре сухаласа-акса пусă çаврăнăшне кĕртнĕ. Кунсăр пуçне çĕр улми 32 гектар лартнă, хĕрлĕ кăшманпа кишĕр 1-ер акнă. 20 гектар çинче сидерат культурăсене /рапспа горчица/ çитĕнтерсе тăпра пулăхне лайăхлатать.
Çĕнĕ Ахпÿрт ялĕ çумĕнче çĕрулми тата севок управĕсем туса лартнă. Шалти сывлăша автомат йĕркелет — хĕлле продукцие ăнăçлă упрама май паракан температура тытса тăрать. «Иккĕмĕш çăкăр» та, севок та çĕрсе шăнмасть. Суйласа сутса пĕтереççĕ. Ку ĕçе 10-12 çынна явăçтараççĕ.
Хуçалăхăн пурĕ 200 гектара яхăн çĕр. Ял хуçалăх культурисене акас-лартас, пухса кĕртес, тирпейлес ĕçсене механизациленĕ. МТЗ трактор — 4, тăпрана кăпкалатмалли тĕрлĕ йышши машина çителĕклех. Тепĕр МТЗ туянмашкăн кредит илме документсем хатĕрлесе çитернĕ.
ХФХ тĕллевĕсемпе кăсăклантăм.
— Севок тупăшлă культура, —терĕ Евгений Михайлович. — Лайăх сутăнать. Вăл хуçалăха аталантармалăх ÿлĕм те парасса шанатпăр. Кăçал тырă хумалли ангар тума пуçласшăн.
Евгений Михайлович мăшăрĕ Людмила Вячеславовна бухгалтер хуçалăхăн укçа çаврăнăшне йĕркелет, налук-тÿлевпе вăхăтра татăлать, финанспа çыхăннă ытти ĕçе вăхăтра пурнăçлать. Кĕркунне, севок пухнă чухне, ĕçлекенсем валли апат хатĕрлесе ĕлкĕрет.
Юрий МИХАЙЛОВ хатĕрленĕ
Источник: "Хыпар"