Публикации » Аслисем тĕслĕхлĕ

Çĕнĕ Ахпÿртри пĕтĕмĕшле пĕлÿ паракан тĕп шкулăн пĕрремĕш тата виççĕмĕш класĕнче вĕренекенсем Патăрьелĕнчи “Çăкăр” музейри “Киндукуш тăвĕнче ыталарĕ пире вăрçă” курава çитсе курчĕç. Н. Румянцева экскурсовод ачасене 40-мĕш армин ĕçлĕ карттипе паллаштарчĕ, Афганистанри моджахедсемпе çапăçнă вырăнсене кăтартрĕ. Чăвашран 244 салтак çак вăрçа лекнĕ, 115-шĕ вилнĕ. Çапăçусем 10 çула тăсăлнă. Арçынсемпе танах 50 яхăн медсестра Афганистан вăрçин йывăрлăхне тÿссе ирттернĕ. Электричествăсăр палаткăсенче, хирте аманнă салтаксене пулăшу панă.

Ачасемшĕн экскурси усăллă иртрĕ. Афганецсен тумĕ, фотоальбомсем, хаçатсем интереслĕ пулчĕç. Сăмах май, Çĕнĕ Ах-пÿртрен те 13 кайнă унти вăрçа: Ю. Майрушкин, В. Шикиров, В. Тукмаков, А. Каштанов, Ю. Кротов, Р. Бородов, Ю. Чернов, Г. Синеев, Н. Артемьев, А. Ильин, А. Артемьев, А. Майоров, Ю. Сачков. Вĕсем – ачасемшĕн ырă тĕслĕх. Вĕренекенсем аслисем пекех патвар та харсăр салтаксем пуласса шанса тăрас килет.