25 февраля 2015 г.
Литературăпа К. Иванов çулталăкĕ старт илни иккĕмĕш уйăх ĕнтĕ. Çавна май тата иртсе кайнă Культура çулталăкне пĕтĕмлетсе Çĕнĕ Ахпỹрт ял тăрăхĕнче уяв каçĕ ирттерчĕç. Ăна ял тăрăхĕн пуçлăхĕ В. Тукмаков уçрĕ. Пурне те пĕлтерĕшлĕ мероприятипе саламланă май литература пурнăçра мĕнле вырăн йышăннине чарăнса тăчĕ. Валентин Петрович çавăн пекех кĕнеке вулама ваттине те, вĕттине те анлăн явăçтармаллине палăртрĕ. Чăваш совет литературине тивĕçлĕ тỹпе хывнă, вилĕмсĕр "Нарспи" поэмăна çырнă К. Иванов пултарулăхне кашнийĕн çывăх пĕлмеллех пирĕн. Унăн сыпăкне Г. Солдатова вуласа пачĕ.
Уяв концертне ăста юрă-ташă хастарĕсем хутшăнчĕç. Ăна Кивĕ Катекри "Самана" фольклор ушкăнне çỹрекен Е. Кузнецова ертсе пычĕ. Çĕнĕ Ахпỹртри пĕтĕ-мĕшле пĕлỹ паракан тĕп шкулти вырăс чĕлхипе литературине вĕрентекен Л. Казакова вĕренекенĕсем "Спящая красавица" сценка лартрĕç. Культура çурчĕ çумĕнчи ачасен пултарулăх ушкăнĕ чăваш поэчĕсен сăввисенчен кĕвĕленĕ юрăсемпе тата хăпартлантаракан ташăсемпе савăнтарчĕ.
Ю. Самойлов ертсе пыракан "Самана" ушкăн çинчен вара уйрăммăн палăртса хăварас килет. Унта 15 çын çỹрет. Репертуарта тăванлăх, самана, юрату, халăх юррисем. Куракансем Л. Терентьева юрланă "Кайăк хур карти", И. Кошкинапа М. Никитина "Упăшкана юрас тесе", В. Николаев "Седая ночь", Н. Падисовапа Н. Кувшинова шăрантарнă "Каçарать атте-анне" юрра, Е. Ларионова, С. Сорокина тата ыттисен пултарулăхне те тивĕçлипе хакларĕç. Ял тăрăхĕн ертỹçи Кивĕ Катексен фольклор ушкăнĕн ташă-юрă ăстисен тăрăшулăхне тивĕçлĕ вырăна хучĕ. Вĕсем ытти уявсене те илем кỹрессе шанса тăнине палăртрĕ. Хăйсен пултарулăхне ялтан-яла çỹресе кăтартма кирлине çирĕплетрĕ.
Уяв каçĕ кашнийĕн чĕринче савăнăç çуратрĕ.
В. ЛАРИОНОВ. Кивĕ Катекри культура çурчĕн директорĕ
Источник: "Авангард" (газета Батыревского района)