14 мая 2014 г.
Райадминистрацин вĕрентỹ пайĕн планĕпе килĕшỹллĕн шкул директорĕсем Татмăшри пуçламăш шкул-ача садне ĕçлĕ тĕл пулăва пуçтарăнчĕç. Вĕсем икĕ ушкăна уйрăлса кунта тата Кивĕ Катекре уçă уроксем, занятисем итлерĕç. В. Солдатова 4 класра вĕренекенсемпе вырăс чĕлхи урокĕнче наречи пуплев пайĕ пулнине тишкерчĕç. 2-3-мĕшсем тепĕр В. Солдатовапа литература вулавĕнче "Савнă тăван ен" çул çỹ-ревре пулчĕç. Пĕрремĕшсемпе Л. Иванова вĕрентекен математикăра теçетке урлă хушма вĕренчĕç. Тĕрлĕ çулхи ачасен ушкăнĕпе В. Филиппова воспитатель сывлăхсăр пурнăç çуккине палăртса тĕпчесе хăварчĕç.
Кивĕ Катекри кĕçĕн ушкăна çỹрекен ачасемпе И. Быкова воспитатель Г. Баллăн "Желтячок" калавĕпе паллашрĕç. Ирина Николаевна çитĕнекен ăрăвăн ас тăвăмне, пуплевне аталантарас тĕ-лĕшпе тĕрлĕрен ĕç туса ирттерчĕ. Аслă ушкăнри ачасем Л. Владимирова ертсе пынипе асамлă юмах тĕнчинче пулчĕç, компьютер пулăшăвĕпе викторинăра юмахсен ячĕсене пĕлессипе тупăшрĕç, "Кашкăрпа çичĕ качака путекне" выляса кăтартрĕç. Кашни учительпе воспитатель вĕрентĕвĕн çĕнĕ технологийĕпе анлăн усă курчĕ.
Тĕл пулура ачасем музыка руководителĕ ертсе пынипе паха концерт кăтартрĕç. Вĕсем илемлĕ юрăсемпе, тĕрлĕ ташăпа, хамăр ентешсен сăввисене вуласа савăнтарчĕç. Концерта шкул ачисенчен йĕркеленĕ фольклор ушкăнĕ "Чăваш вăййи" композиципе илем кỹчĕ.
Канашлăва хутшăннисем В. Солдатова ертỹçĕн патшалăх вĕрентỹ стандартне мĕнле пурнăçа кĕртсе пынин докладне итлерĕç, ĕçре кирлĕ сĕнỹсем пачĕç.
И. СЕЛИВАНОВА
Источник: "Авангард" (газета Батыревского района)