16 мая 2012 г.
Çĕнĕ Ахпÿртри пĕтĕ-мĕшле тĕп пĕлÿ паракан шкулти пуçламăш класри ачасем Культура çуртĕнче вăрçă ветеранĕсемпе тĕл пулу ирттерчĕç. Ялта пиллĕкĕн юлнă вĕсем: Илья Ширтанов, Петр Майоров, Вячеслав Уруков, Василий Аляков, Петр Трифонов. Хаяр вăрçа 500 ытла салтак кайнă. 231-шĕ çеç каялла таврăнайнă. Тĕл пулăва вăрçă çулĕсенчи ытти ватăсем те килнĕ. Весенчен пĕри – Л.Волкова, вăл ялти шкулта биологи вĕрентекенĕ пулнă. “Ирсĕр вăрçă ман ĕмĕте татрĕ, – аса илет ветеран.– Аттен тетĕшĕ çемйипе Мускавра пурăнатчĕ. Анне вĕсемпе мана врача вĕренме унта илсе каясси пирки сăмах пуçарнăччĕ. Анчах пулмарĕ. Вăрçă пуçланчĕ. Хаяр хыпара илтсе пурте урама тухрăмăр. Кам йĕрет, кам юрлать. Вăрçа ăсатнисем куç умĕнче.
Пирĕн анне лашапа Канаша тырă ăсатма каятчĕ. Эпир килти ĕçсене тунă. Çиме хура çăкăрсăр пуçне нимĕн те пулман. Шкулта кĕнекесĕр вĕреннĕ. Чернила хăрăмран тунă. Шурă хут сутатчĕç. Ăна хуçлатса тетрадь евĕр ăсталанă, шур пиртен çĕленĕ сумкана чиксе çÿренĕ. Урара çăпата, çире фуфайка пулнă. Çавах пиллĕксемпе çеç вĕреннĕ.
Çĕнтерÿ савăнăçĕ нихăçан та сÿнмест, çулран-çул аякка кайса пырать пулин те аса илÿ пĕрех юлать”.
Феофания Волкова вара ялти медпунктра фельдшер пулса ĕçленĕ. “Пирĕн килтен вăрçа виçĕ тетепе атте кайнă. Эпĕ ун чухне пиллĕкре пулнă. Хиртен пĕр витре çĕрулми те, тырă та илсе килме юраман. Пурнăçĕ йывăр пулнă, çапах чăтнă. Ялта 500–600 ача ÿснĕ. Улăм çунтарса каланккара апат пĕçернĕ. Патшалăха аш-какай, тир, çăм памалла пулнă. Белоруссинчен килнĕ эвакуированнăйсене те май пулнă таран пулăшнă. 60-мĕш çулсенче çеç пурнăç лайăхланнă. 1968 çулта электричество çути курнă”, пĕлтерчĕ вăл.
Источник: "Авангард" (газета Батыревского района)