20 января 2015 г.
Чăваш Ен Пуçлăхĕ Михаил Игнатьев çулсеренех республикăн Патшалăх Канашне тата чăваш халăхне яракан Çырупа паллаштарать. Асăннă документра республикăна аталантармалли актуаллă ыйтусене палăртаççĕ, отрасльсенчи ĕçсене тишкереççĕ.
Çырусенче юлашки тăватă çулта Чăваш Енре пурăнакансене паракан медицина пулăшăвĕн пахалăхĕ тата ăна кашнин патне çитересси пирки те хускатнă.
Республикăра халăх йышĕ ỹсет, çынсем 70, 79 çулсем таран пурăнаççĕ халь. 2010 çулхипе танлаштарсан ку кăтарту 2,25 çул чухлĕ пысăкланнă.
Сывлăх сыхлавне финанспа тивĕçтересси 2 хут ỹснĕ.
Асăннă отрасле çĕнетме пулăшакан программăна республикăра 2013 çулта пурнăçа кĕртнĕ.
Ял халăхне медицина пулăшăвĕ парассине лайăхлатасси çине пысăк тимлĕх уйăраççĕ. Икĕ çулта Чăваш Енре паянхи кунпа килĕшỹллĕ 60 фельдшерпа акушер пункчĕ хута янă.
Медицина работникĕсен пĕр уйăхри вăтам ĕç укçи ỹснĕ. Медицина пулăшăвĕн пахалăхĕпе 2014 çулта республикăра пурăнакансен ытларах пайĕ кăмăллă юлнă.
2013 çулта аслă ăрури çынсене медицина тĕрĕслевĕсем (диспансеризации) витĕр кăларма пуçлани те лайăх пулăм. "Халăха сыватмалли тăкаксене пĕчĕклетес тесен, наци сывлăхĕшĕн тăрăшмалла, профилактика ĕçĕсене ытларах тимлĕх уйăрмалла", - тенĕ 2013 çулхи Çырура Республика Пуçлăхĕ.
Чăваш Енре 400 пин ытла çын тĕрлĕ сăлтавпа социаллă хỹтлĕх илет, вĕсенчен 240 пин ытларахăшĕ аслă ăрури çынсем.
Кашни пиллĕкĕмĕш çын халь республикăра пенсионер. "ЧР ĕç ветеранĕ" ята илме 2014 çулхи ноябрĕн 26-мĕшĕнченпе хĕрарăмсене 37 çул та ултă уйăх ĕç стажĕ кирлĕ, арçынсен 42 çул та ултă уйăх ĕçлемелле.
Пурăнмалли çурт-йĕрпе коммуналлă хуçалăх услугисемшĕн тỹлеме кашни тăваттăмĕш çын патшалăх пулăшăвĕ илет.
Тăватă çулта республикăра 5446 вăрçă ветеранĕ пурăнмалли условийĕсене лайăхлатнă. Инвалидсен проблемисене татса парас енĕпе те тĕрлĕ мерăсем йышăннă иртнĕ çул.
Çулсерен массăллă информаци хатĕрĕсем Патшалăх Канашне янă Çырăвăн тĕллевĕсене çутатаççĕ. 2014 çулхи январь-ноябрь уйăхĕсенче хаçат-журналсенче 2 пине яхăн материал пичетленнĕ асăннă темăпа.
Пралуксăр телефон çыхăнăвĕ лайăхрах ĕçлеме пуçланă республикăра.
2012 çулхи документра акă, цифрăллă телевидени системине аталантармалли ыйтăва хускатнăччĕ. 2014 çул вĕçĕнче Шупашкарта, Канашра, Тăвай ялĕнче пурăнакансем ку çĕнĕлĕхпе усă курма пуçларĕç те.
ЧР пурăнмалли çурт-йĕрпе коммуналлă хуçалăх Порталне ĕçлеттересси пирки сăмах пынăччĕ виçĕ çул каяллахи Çырура. Пĕтĕм Раççейри "ПРОФ_IТ. 2014" конкурсра чи лайăххисен йышне кĕме пултарнă асăннă портал пĕлтĕр.
2014 çулхи Çырура Министрсен Кабинечĕн ларăвĕсене тỹрĕ эфира кăлармалли тĕллев лартнăччĕ. Информаци политикипе массăллă коммуникацисен министерстви тăрăшнипе ку ыйтăва хăвăртах татса панă. Çулталăк вĕçĕнче "Халăх контролĕ" портал ĕçлеме пуçланă. "Уçă Чăваш Ен" проекта пурнăçа кĕртсе пынин тепĕр утăмĕ ку.
"Агропромышленность системинче вăй хуракансен çĕрсемпе эффективлă усă курма пуçламалла. Юхăннă çĕрсене ĕçлесе хатĕрлемелле, çĕр лаптăкĕсене инвентаризацилемелле", - тесе палăртнăччĕ пурнăçа лайăхлатма пулăшакан документра Республика Пуçлăхĕ Михаил Игнатьев.
2011-2014 çулсенче пирĕн республикăра ял хуçалăх пĕлтерĕшлĕ 195,7 пин гектар лаптăк чухлĕ çĕр регистрациленĕ. Çĕр пайĕсене шута илессипе Канаш, Шăмăршă, Тăвай, Елчĕк районĕсенче ĕçсем начар мар пыраççĕ.
Стройка ĕçĕсем тума уйăрнă çĕр участокĕсене тĕллевлĕ усă курнине çирĕп контрольте тытаççĕ.
Çĕр участокĕсен списокне хатĕрлесе пĕтерме йышăннă 2013 çулхи документра. Паянхи кун пĕрлехи информаци ресурсĕ 552 гектар çинчи 205 çĕр участокĕ пирки информаци пама пултарать. Эконом-класлă çурт-йĕрĕн 86 участокĕ пирки информаци пур тата, инвестици проекчĕсене пурнăçа кĕртмелли 119 участок пирки те пĕлме пулать.
Пушă, эффективлă усă курман çĕрсен реестрне тăвас задачăна та пурнăçланă Чăваш Енре.
Республикăра ĕçсĕрлĕхе регистрацилессине чакарас ыйтăва хускатнăччĕ 2011 çулта. Ĕçсĕрлĕх кăтартăвне пĕчĕклетессипе Чăваш Ен виçĕ çул хушшинче 12-мĕш вырăнтан çиччĕмĕшне çĕкленнĕ. Ĕçпе тивĕçтерекен службăсем çулсерен 3,3 пин çынна вĕренме янă.
Михаил Васильевич Игнатьев кашни çулах çул-йĕр çинчи куçăм хăрушсăрлăхĕ пирки сăмах хускатнă. "Медицина пулăшăвĕ парас системăна çĕнетсе пынине пăхмасăр çул-йĕр çинчи инкексене пула çынсем вилни шухăшлаттарать. Кунта медицинăри кăна мар, социаллă культурăри ыйтусем те витĕм кỹреççĕ пулас", - тенĕ вăл ЧР Патшалăх Канашне янă Çырăвĕнче.
2014 çул вĕçĕнче Чăваш Енри çул-йĕр çинче инкек пулассин кăтартăвĕ чакни пирки палăртнă Министрсен Кабинечĕн Председателĕ Иван Моторин ертсе пынă декабрĕн 29-мĕшĕнче иртнĕ ларура.
"Çул-йĕр çинчи куçăмăн хăрушсăрлăхне 2013-2020 çулсенче ỹстересси" тĕллевлĕ федераллă программăпа килĕшỹллĕн чылай ĕçсем пурнăçланă пирĕн республикăра.
Тăван тавралăха упрас тата экологи культурине лайăхлатас ыйтусене пăхса тухса Чăваш Енре виçĕ çул хушшинче санкци паман 3652 çỹп-çап купине пĕтернĕ тата ытти ĕçсене тунă.
Чăваш Республикин Пуçлăхĕ Михаил Игнатьев карлачан 21 -мешенче Чаваш Республикин Патшалăх Канашне яракан Çыравенче палăртакан тĕллевсене пурнăçласси те 2015 çулта малалла пулса пырĕ.
Источник: "Ял ĕçченĕ"