17 января 2015 г.
2013 çултан пуçласа Чăваш Республикинче çурт-йĕрсĕр уçă çĕр лаптăксен пĕрлехи информаци ресурсне йĕркелеме тытăннине чылайăшĕ пĕлет пулĕ. Ăна вăя кĕртнин пĕлтерĕшĕ пысăк, çĕр хăй тĕп категорине тивĕçтерни пирки информаци уçă пулмалла, çавăн пекех вăл е ку çĕр лаптăкĕпе кăсăкланакансем çак пурлăх пирки тĕрĕс сведени пĕлме пултармалла. Пĕтĕмĕшле илсен вара çÿлерех асăннă информацисем уççăнлăха тухмалла. Çапла вара пĕрлехи информаци ресурсĕпе усă курни пысăк пĕлтерĕшлĕ чылай ĕç вăя кĕртме май памалла.
"Инвесторсен чăн майсем уçăлчĕç. Вĕсем пушă çĕр лаптăкĕсен калăпăшĕ, вырăнĕ пирки тĕрĕс информаци илеççĕ, инфраструктура хăш шайра пулни çинчен пĕлеççĕ, çапла майпа инвестици проекчĕсене вăя кĕртессипе кирлĕ йышăну тума пултараççĕ, - палăртнă ку тĕлĕшпе хăй шухăшне Чăваш Ен Пуçлăхĕ Михаил Игнатьев Чăваш Патшалăх Канашĕн ХХ сессийĕнче.
Инвестици ĕçĕ-хĕлĕшĕн лайăх майсем туса парасси республикăри ĕç тăвакан влаç органĕсен тата вырăнти хăй тытăмлăх органĕсен тÿрĕ тивĕçĕ шутланать, вĕсен ку енĕпе ĕçе тытăмлăн, тĕллевлĕн тата тухăçлăн йĕркелемелле. Чăваш Енре Чăваш Республикин Ĕç тăвакан влаç органĕсен лайăх инвестици климатне тивĕçтерес енĕпе тумалли ĕç-хĕл стандартне, Чăваш Республикин Инвестици декларацине, Чăваш Республикин 2020 çулчченхи Инвестици стратегине, инфратытăм объекчĕсен строительствин планне йышăннă.
Чăваш Республикин Пурлăх тата çĕр хутшăнăвĕсен министерствин информацийĕ тăрăх паянхи кун тĕлне Чăваш Енĕн пĕрлехи информаци ресурсне 552 гектарлă 205 çĕр лаптăкĕ пирки тулли информаци кĕртнĕ, вăл шутра çурт-йĕр çĕклеме - 222 гектарлă 86 лаптăк, инвестици проекчĕсем валли - 330 гектарлă 119 çĕр лаптăкĕ. Иртнĕ çул пĕрлехи ресурса 77 лаптăк пирки тулли сведени кĕртнĕ. Малашенхи тĕп тĕллев вара çав лаптăксемпе тĕллевлĕ те тухăçлă усă курасси, экономикăн тĕрлĕ отрасльне аталантарма тивĕçлĕ проектсем вырнаçтарасси пулса тăрать.
Хальхи вăхăт тĕлне ресурса кĕртнĕ 47 гектарлă 56 çĕр лаптăкĕ çинче инвесторсем хăйсен проекчĕсене вăя кĕртеççĕ. 16 гектарлă 7 лаптăка инвестици проекчĕ тата пурăнмалли çурт-йĕр валли уйăрнă. Унсăр пуçне 5,7 гектарлă лаптăка нумай ачаллă 49 çемьене пайласа панă.
Хальхи вăхăт тĕлне район шайĕнчи лару-тăру ку тĕлĕшпе çапларах. Район администрацийĕн пурлăх тата çĕр хутшăнăвĕсен пайĕ пĕлтернĕ тăрăх Москакасси ял тăрăхĕнчи 3,9 гектарлă республика харпăрлăхĕнчи çĕр малтанласа пăлартнă тăрăх инвестици проекчĕ валли юрăхлă. Тепĕр объекчĕ те çак тăрăхрах вырнаçнă, унăн калăпăшĕ 2,4 гектар, муниципалитет харпăрлăхĕнче, малтанласа палăртнă тăрăх çурт-йĕр çĕклеме ирĕклĕ.
Çатракасси ял тăрăхĕнчи 17,9 гектарлă çĕр малтанласа палăртнă тăрăх çурт-йĕр тума вырăнлă.
Мăн Сĕнтĕрти 2,4 гектарлă промышленноç çĕрне инвестици объекчĕ валли пăхнă.
Катькас ял тăрăхĕнчи 0,10 гектарлă обществăлла ĕçлĕ хутшăну тĕлĕшри çĕр лаптăкĕ инвестици объекчĕ валли вырăнлă.
Шетмĕпуç ял тăрăхĕнчи 0,90 гектарлă лаптăк та çÿлерех асăнни тĕллевлĕ.
Çапла вара çĕр пысăк пурлăх пулнине шута илсе 2015 çулта пĕрлехи информаци ресурсне татах та анлăлатас, çавна май инвестици илĕртÿлĕхне ÿстерес тĕлĕшпе вырăнти хăй тытăмлăх органĕсем умне республика ертÿлĕхĕ пысăк тĕллев лартнă.
Р. Илларионова.
Источник: "Çĕнтерÿ ялавĕ"