11:13 03 апреля 2016 г.
2016 çулхи ака уйăхĕн 2-мĕшĕнче Упамса ял клубĕнче кулăш кунне халалласа пысăк уяв каçĕ иртрĕ. Кулăш ăстисем – «Чăваш бабкисем» - ял ĕҫченĕсем – Лисова Наталья тата Белкова Лидия уяв каҫĕ тăршшĕпех тĕрлĕ шӳтле мыскарасем кăтартса савăнтарчĕҫ. Упамса ача сатне ҫӳрекенсем (Марышкина Аньăпа Пятаков Павел) Кайăксен кунĕ ячĕпе юрă юрларĕҫ (сăмах май каласан Кайăксен кунĕ Кулăш кунĕпе тĕл килет). Кĕҫĕн класра вĕренекен ачасен (Федотова Арина, Васильева Даша, Лисова Ангелина, Пятакова Лера, Анфиса, Карина тата Милана Сымовăсем) шӳтлĕ ташшисем те питĕ кăмăла кайрĕҫ. Турханти пĕтĕмешле пĕлÿ паракан шкулти аслă классене ҫӳрекен хĕрсем (Сымова Анна, Стефейкина Вика, Столярова Диана) тĕрлĕ халăх ташшисене кăтартрĕç.
Ял ҫамрăкĕсем – Сымов Андрейпа Марышкина Ирина шӳтлĕ мыскарасемпе халăха култарчĕҫ. Хор кружокне ҫӳрекенсем илемлĕ юрăсем шăрантарчĕҫ, ĕлекхи йăла-йĕркене аса илсе улах ларнине кăтартса пачĕҫ. Илемлĕх ертӳҫи – педагогика ĕҫ ветеранĕ – Елена Дмитриевна Сымова купăс каласа савăнтарчĕ, хăй ҫырнă сăвăсемпе паллаштарчĕ.
2016 ҫул Рассейре Кино ҫулталăке, Чăвашра Ĕҫҫынни ҫулталакĕ пулнине кура юрăҫăсем киноран илне юрăсем те шăрантарчĕҫ. Еҫҫинчен хывнă юрăсем те, сăвăсем те пулчĕҫ. Турханти пĕтĕмешле пĕлӳ паракан шкулăн 6-мĕш класра вĕренекен Стефейкина Ванесса ĕҫҫинчен çырнă сăвă вуларĕ. Раиса Степанова, Марина Стефейкина тата Нина Савельева «Укҫа мыскари» камит кăтартрĕҫ.
Упамсари ача сатĕнче вăй хуракан Марина Козлова гитара каласа хăй ҫырнă юррине шăрантарчĕ. Уяв ертӳси - Упамса ял клубĕн культура ĕҫне йĕркелекенĕ - Вавилова Венера хăй те юрăсем юрларĕ, уяв программине шӳтсемпе пуянлатрĕ.
Куракансем сцена ҫине хăпарса уяв каҫне йĕркелекенсене тав сăмахĕ каларĕҫ, концерт кăмăла кайнине палăртрĕҫ.
Тарханское сельское поселение Батыревского района