20 января 2020 г.
2020 çулта тĕрлĕ профессинче палăрнисем «Чăваш автономийĕ 100 çул тултарнă ятпа» асăнмалăх медале тивĕçлĕ пулĕç. Кашни сферăра чи малтисене халăх сасăлавĕпе суйланă. Сасăлав иртнĕ çулхи раштавăн 23-мĕшĕнчен пуçласа кăçалхи кăрлачăн 15-мĕшĕччен «Халăх контролĕ» порталта пынă.
Пирĕн районăн тĕрлĕ сферăри пултаруллă ĕçченĕсем те çав шутра пулнă. «Чи ла-йăх комбайнер» ята тивĕçнĕ Д. Артемьев хăйĕн пурнăçне ялхуçалăхпа çыхăнтарнă. Вăл М.Тагеев хресченпе фермер хуçалăхĕнче вăй хурать. Михаил Леонидович хуçалăхĕ хальхи техникăпа анлăн усă курать. Пĕлтĕр унта «Acros – 580» çĕнĕ комбайнпа Д.Артемьев çамрăк механизатор 720 гектар çинче 1580 тонна тыр-пул пухса кĕртнĕ. «Район администрацийĕн ялхуçалăх пайне тав сăмахĕсем каласа хăварас килет сасăлава тăратнăшăн. Тата чи ырă сăмахсем – хуçалăх ертÿçине Михаил Леонидовича, мана шаннăшăн, ĕненнĕшĕн. Вăл ăста ертÿçĕ,тăрăшуллă, ĕçтешĕсене ăнланма пĕлекен фермер. Çавăнпа та çулсерен ÿсĕмсем тăвать»,- мăнаçланчĕ çамрăк комбайнер.
Каласа хăвармалла, иртнĕ çул Артемьевсен çемйинче виççĕмĕш ача çуралчĕ: икĕ маттур каччă çумне хĕр пĕрчи хутшăнчĕ. Апла пулсан, ялта пурăнакан çамрăксен пуласлăхĕ пур тесе шантарса калама пулать. «Çемьере пĕр-пĕрне ăнланнинчен нумай килет. Мăшăрăм, Елена, мана ялан пулăшса пырать, эпĕ вара ачасем тулăх пурнăçпа ÿсчĕр тесе тăрăшатăп. Кил-йыш çĕнĕ пÿртре çĕнĕ тĕллевсемпе, ÿсĕмсемпе пурăнтăр тесе шутлатăп».
О. СЛАВИНА.
Источник: "Наше слово" ( Мариинско-Посадская районная газета)