08:20 30 декабря 2019 г.

Оригинал

Йăлл! йăлкăштарчĕ вут-хĕмне            

 Илемлĕ ёлка пирĕн.             

Çĕклерĕ вăл кашнин чунне,            

   Янратрĕ юрă вирлĕн.     

    Сител клубĕнче паян савăк кăмăл, йăл-йăл кулă, илемлĕ юрă хаваслăн янăрарĕ. Мĕншĕн тетĕр-и? Ара çĕнĕ çул çывхарса килет. Çавна май кунта Ирина Лякова культорганизаторпа Оксана Хомуткина библиотекарь ачасем валли савăнăçлă уяв йĕркелерĕç.      Вĕсем ирттернĕ ёлкăна кам кăна килме хапăл туман-ши? Унта паян вăрман тусĕсене, юмахри сăнарсене, тĕрлĕ халăх çыннине те курса савăнма май пулчĕ. Ачасенчен нумайĕшĕ карнавал тумĕсене тăхăнса килни елкăна самай капăрлатрĕ.  Пурте хаваспах Хĕл Мучипе Юр Пике патне васкаса çитнĕ. Кашнийĕшех сăвă-юрă вĕренсе килме хапăл тунă.     

   Уявра культорганизатор хăнасене, ял-йыша, ачасене Çĕнĕ çулпа саламласа шăши çулне тулли кăмăлпа кĕтсе илсе ирттерсе яма сунчĕ. Унтан пурте пĕрле симĕс чăрăш тавра тăрса юрăсем юрларĕç, тăпăртатса ташăсем ташларĕç, вăйăсем вылярĕç. Çĕнĕ çулăн чи кĕтнĕ хăнисем, Хĕл Мучипе Юр Пике килсессĕн пĕр-пĕринпе ăмăртмалла сăвăсем каласа савăнтарчĕç. Хĕл хуçийĕ хитре сăмахĕсемшĕн, маттурришĕн кучченеçсем парса хавхалантарчĕ.    

    Ёлка питĕ чаплă та кăсăклă иртрĕ, пурне те савăк туйăм парнелерĕ.

Первомайское сельское поселение Батыревского района