09:33 21 ноября 2019 г.

Оригинал

  Çитес çул иккĕмĕш Тĕнче Вăрçи пĕтнĕренпе 75 çул çитнине уявлатпăр. Хаяр тăшмана Совет Союзĕн тата ытти нумай çĕршыв çĕрĕсем çинчен хăваласа кăларса янине анлăн паллă тума палăртаççĕ.      

   Акă Белоруççи халăхĕ фашистсенчен хăтăлнăранпа 75 çул çитнине кăçал уявларĕ. Çак ятпа вĕсем Тĕнче Вăрçинче çапăçнă, хăйсен ирĕклĕхĕшĕн кĕрешнĕ хальхи вăхăтра сывă пурăнакан пĕр ветерана та манса хăвармарĕç. Пурин валли те ятарласа юбилей медалĕ хатĕрлерĕç.      

   Шăпах çакăн пек пысăк чыса Сителти Василий Ляков та тивĕçрĕ. Аслă Арапуç тăрăхĕнчи пĕртен пĕр сывă ветерана шăпа Белоруççин пĕрремĕш фронтĕнчи артиллери полкĕнче хаяр тăшмана хирĕç кĕрешме пÿрнĕ. Кунран- кун наводчик пулса çапăçакан сержанта вилĕм сыхласа çÿренĕ. Анчах та вăл никама та парăнман, ытти миллион салтак евĕр паттăррăн çапăçса пире Çĕнтерÿ парнеленĕ.      

  Çак хаклă медальпе чыслама Василий Лякова хисеп туса хаклă хăнасем республикăран, районтан, ял тăрăхĕнчен килне килсех саламларĕç. Вĕсем 97 çулхи ветерана хаяр тăшманпа паттăррăн кĕрешнĕшĕн тав тунă май сывлăхлă пулма, 100 çула çитме сунчĕç, сумлă парнесемпе те савăнтарчĕç.

Первомайское сельское поселение Батыревского района