15:17 14 октября 2019 г.
Çÿллĕ те капмар çуртсем, илĕртÿллĕ те хитре парксем, таса та тикĕс çулсем…. Шăп çаксем ĕнтĕ ял сăн-сăпатне çутатса илемлетекеннисем. Çавна шута илсе Сителсем час-часах хăйсем пурăнакан кил-тĕрешне, урамри çулсене тирпейлесе, йĕркелесе пыма тăрăшаççĕ. Ялти депутатсемпе старостасем, культура ĕçченĕсем пуçарнипе тăтăшах субботниксем ирттереççĕ.
Çак канмалли кунсене те ял-йыш сая ярас темерĕ. Вĕсем вырăнти депутат Николай Вазенков йĕркеленипе пĕр шухăшлăн пулса Пионер урамĕнчи Чăпăк çырми (халăхра çапла калаççĕ) тĕлĕнчи çула юсарĕç. Тĕрлĕ техникăпа пĕр шикленмесĕрех каçса çÿреме меллĕ пултăр тесе вак кирпĕчсем сарса тирпейлерĕç. Николай Вазенков хăйĕн тракрорĕпех чулĕсене турттарса килсе парса тăчĕ.
Сителсем ĕçе тĕплĕн тусан çеç усси пулассине аван пĕлеççĕ. Çавăнпа та Чăпăк çырми çывăхĕнче пурăнакан, кунта вăй хума хапăл тунă маттурсем питĕ тăрăшрĕç, малашне çынсене иртсе кайма кăмăллă пултăр терĕç.
Эпир çак хастарсене ял шăпишĕн, унăн илемĕшĕн ĕçлеме юратакансене чун-чĕререн тав тăватпăр. Яланах вĕсенче вăй-хăват тапса тăтăр, пĕр-пĕрне пĕр май пулăшма вăхăчĕсем тупăнса пыччĕр.
Первомайское сельское поселение Батыревского района