17:49 08 января 2023 г.
Ҫӗнӗ ҫула кӗрсенех, кӑрлачӑн 7-мӗшӗнче, православи тӗнне ӗненекенсем Христос Ҫуралнине уявлаҫҫӗ. Ҫак кун — ҫулталӑкри чи илемлӗ те ҫутӑ кунсенчен пӗри. Раштав уявӗ мӗн авалтан ҫынсене ҫутӑ туйӑмсем, шанчӑк, ӗненӳ парса тӑрать. Сителти клубра шӑпах ку пулӑм ячӗпе "Раштавра юрлатпӑр савӑнса" уяв ирттерчӗҫ. Йăлана кĕнĕ тăрăх Оксана Хомуткина библиотекарьпа Ирина Лякова культорганизатор ку мероприятине ҫулсеренех йӗркелеҫҫӗ. Кашни ҫул хӑйне евӗр интереслӗрен те интереслӗрех ирттерме тӑрӑшаҫҫӗ. Кăçал та уяв ҫӗнӗ юрӑ-ташӑсемпе, вӑйӑсемпе пуян пулчӗ.
Клуба килме хапăл тунисем самаях пулчĕç. Вĕсене нимĕнле сивĕсем те, пăрланса ларнă шуçлак çулсем те хăратмарĕç. Ара ял халăхĕпе пĕрле савăнмашкăн пурте хапăл-çке.
Елкăна тĕрлĕ кăсăклă карнавал тумне тăхăнма ÿркенменнисем те пайтах пуçтарăнчĕç, хăйсен илемĕпе çынсене тĕлĕнтермеллипех тĕлĕнтерчĕç. Хитрелĕхĕпе çеç мар пултарулăхне тĕрлĕ енлĕн кăтартса, чун каниччен илĕртÿллĕ ташăсем ура хуçса ташласа та курма килнисен кăмăлне хăпартлантарса савăк туйăм парнелерĕç.
Кашни Ҫӗнӗ ҫулхи уявсен хуҫисем, Хĕл Мучипе Юр Пике, пухăннисене тĕрлĕ конкурспа вăйă выляттарса вӗсем мĕн пултарнине тĕрĕслерĕç, унтан пурне те пылак кучченеçсемпе сăйларĕç. Çак уявра никама та манса хăвармарĕç, пурин кăмăлне те çырлахтарма пултарчĕç.
Первомайское сельское поселение Батыревского района