11:51 29 ноября 2022 г.
Анне... чи ăшă сăмах тĕнчере,
Чи ырă сăмах чĕлхере.
Аннесĕр тĕнче те кичем
Унпа çеç килет пур илем.
Ноябрь уйăхĕн вĕçĕнче пĕтĕм çемье чи хаклă çыннăн кунне паллă тăвать. 1998 çултанпа Раççейре ноябрь уйăхĕн юлашки вырсарникунне Аннесен кунĕ тесе йышăннă. Патăрьел районĕнчи Анат Тăрмăш культура çуртенче çак чаплă уява халалласа пысăк концерт йĕркелерĕç. Уяв концертне ял поселенийĕн пуçлăхĕ Мария Мадюкова аннесен ячĕпе чи ырă та ăшă сăмахсем каласа пуçларĕ. Çавăн пекех районти депутатсен пухăвĕн депутачĕ Борис Емельянов аннесене ăшă салам ячĕ.
Концерт программинче аннесене халалланă тĕрлĕ сăвă- юрă янăрарĕ.Амăшĕсемшĕн чи кĕтни - хăйсен ачисенчен салам йышăнни. Тĕрлĕ чĕлхепе янарарĕç анне çинчен хайланă сăвăсем. Культура ĕçченĕсемпе пĕрлех "Çăлкуç" ушкăн хĕрĕсем, хăйсем ик хут анне пулнăскерсем, чуна пырса тивмелле юрăсем шăрантарчĕç. Анне пуриншĕн те чи хаклине, чи кирлине тепĕр хут çирĕплетрĕç сцена ăстисем.
Шаймурзинское сельское поселение Батыревского района