Çулсерен çĕртмен 24-мĕшĕнче пысăк уява – Республика кунне – паллă тăватпăр. Çак тĕлĕшпе тĕрлĕ мероприяти иртет. Кăçал та чăваш халăхĕн, хăнасен юрă-ташăпа киленме, куравсене çитме май пулĕ.
Ĕнер Экспоконтурта «Регионсем – чикĕсĕр хутшăну» регионсен хушшинчи XIX выставка уçăлнă. Курав çулсерен иртет. Унта Раççейĕн вун-вун регионĕнчи, ют çĕр-шыври усламçăсем çитни хутшăнăва çирĕплетме пулăшать. Выставка тĕллевĕ – Раççейри тата чикĕ леш енчи предприятисен хушшинчи суту-илĕве, ĕçлĕ хутшăнăва анлăлатасси, Чăваш Енри, федерацин Атăлçи округĕнчи предприятисем тĕрлĕ отрасльте тунă çитĕнÿсене кăтартасси, ют патшалăхри компанисен опычĕпе паллашасси. Курав ыран хупăнĕ.
Паян «Стратеги новацисен вăхăчĕ» Шупашкарти V экономика форумĕ ĕçлеме тытăнчĕ. Ыран ЧР Министрсен Кабинечĕпе «Лукойл-Атăлнефтепродукт» тулли мар яваплă общество килĕшÿ алă пусĕç. Унăн тĕллевĕ – Чăваш Енри нефтепродукт рынокне тухăçлă ĕçлемешкĕн условисем тăвасси.
«Раççей çăл куçĕсем» халăх пултарулăхĕн Пĕтĕм Раççейри фестивалĕ – Республика кунĕнчи пĕлтерĕшлĕ мероприятисенчен пĕри. Кăçал Раççейĕн 31 регионĕнчен 38 коллектив çитĕ. Беларуçран та, Украинăран та ушкăнсем пулĕç. Чăваш Ене пĕтĕмпе 700 хăна килĕ. Чăваш диаспори те "Тутарстанри, Самар, Сарă ту, Ульяновск облаçĕсенчи коллективсем" хăйсен пултарулăхĕпе савăнтарĕç. Тĕрлĕ çулта «Раççей çăл куçĕсене» АПШран, Бельгирен, Италирен, Египетран, Венгрирен, Намибирен, Иранран, Болгарирен, Чехирен, Германирен, Эстонирен... хăнасем çитнĕ. Çĕртмен 23-24-мĕшĕсенче «Руç ăстисем» конкурс пулĕ. Ăна хальхинче Раççей историйĕн çулталăкне халалланă. Унта çĕр-шывăмăрăн 34 субъектĕнчи 34 ăста хутшăнĕ. Çĕртмен 24-25-мĕшĕсенче Шупашкар районĕнчи «Чăвашагромаркет» ЯХПКра «Уй-хир кунĕ – 2012» выставка ĕçлĕ. Унта агропромышленноç комплексĕн организацийĕсен ертÿçисемпе специалисчĕсем, фермер тата харпăр хуçалăхсем... хутшăнĕç. Куравра ял хуçалăхĕн 100 ытла инноваци техникине курма май пулĕ.
Ыран тата тепĕр кун халăх Фейерверксен фестивалĕпе киленĕ.
Ирина АЛЕКСЕЕВА.