2011.06.28 Юрӑ уйӗнчи тупӑшу (Хыпар)

 Республика кунӗ юрӑ-ташӑран кӑна мар, спорт ӑмӑртӑвӗсенчен те пуян пулчӗ. Юрӑ уйӗнче профессионал боксерсен тата кикбоксинг енӗпе турнир иртрӗ. Унта Чӑваш Ен, Ульяновск облаҫӗн, ҫавӑн пекех Африка спортсменӗсем тупӑшрӗҫ. Кикбоксинг енӗпе тӗрлӗ виҫе категорийӗнче /42, 75, 81, 86 килограмччен/ тата бокс енӗпе /82 килограмччен виҫе категорийӗнче/ иртнӗ ӑмӑртусене куракансем тӑвӑллӑн алӑ ҫупса йышӑнчӗҫ. Ҫапах та Шупашкарти Алексей Соловьевпа Ганӑран килнӗ Ибрагим Лаборан боксерсен тупӑшӑвӗ чи кӗтни, чи кӑсӑкли пулчӗ.

Аса илтерем: Алексей Соловьев - йывӑр виҫере кӗрешекен спортсмен, Раҫҫей Федерацийӗн спортӑн тава тивӗҫлӗ мастерӗ, кикбоксинг енӗпе нумай хутчен Раҫҫей   тата   Европа,    4   хутчен   тӗнче чемпионӗ. Ибрагим Лаборан та /Гана, Аккра хули/ паллӑ спортсмен. Вӑл - Африка чемпионӗ. Шанӑҫ кӳрекен ҫамрӑк боксер Шупашкара ҫӗнтерес тӗллевпех килнӗ. Анчах тытӑҫура чӑваш боксерӗ вӑйлӑраххи турех палӑрчӗ. Соловьев иккӗмӗш раундрах Ибрагим шанӑҫне пӗтерчӗ. Тӑхтав хыҫҫӑн хӑна тупӑшӑва малалла тӑсма килӗшмерӗ.

Ҫӗнтеруҫе Шупашкар хулин пуҫлӑхӗ Леонид Черкесов саламларӗ. «Юрӑ уйӗнчи тытӑҫу» Кубока панӑ май Леонид Ильич Алексей Соловьева хитре ҫӗнтерӳшӗн тата спортри ҫитӗнӗвӗсемпе тӑван хулана, Чӑваш Ене, Раҫҫее чапа кӑларнӑшӗн тав турӗ.

Р.Власова