Çĕртме уйăхĕн 27-мĕшĕнче, Çамрăксен кунĕнче, ЧР Правительствин Председателĕ Олег Макаров республикăри çамрăк армеецсен «Зарница» тата «Орленок» финал вăййисене уçнă.
Палаткăсен лагерĕ Канаш районĕнче вырнаçнă. 1000-е яхăн ача - районсемпе хуласенчи вăйăсен çĕнтерÿçисем - пухăннă.
Чăваш Енри хастар та пуçаруллă çамрăксене саламласа Олег Макаров «пирĕн республика Раççейре çамрăк армеецсен вăййисене ирттерес йăлана 40 çул тытса пыракан йышлах мар регионсен шутĕнче пулнине» палăртнă. «Сирĕн пекех эпĕ те шкул çулĕсенче çамрăк армеецсен вăййисене хутшăннă.
Вĕсем пĕр чăмăра пĕрлештереççĕ, чăтăмлăха тĕрĕслеççĕ, кăмăла çирĕплетеççĕ. Каярах çак пахалăхсем Сире ĕçре ăнăçу тума пулăшĕç», - тенĕ ЧР премьерĕ.
ЧР Министрсен Кабинечĕн Председателĕ республикăри çамрăк армеецсен финалти «Орленок» тата «Зарница» вăййисене уçнă савăнăçлă самантра çамрăксен патшалăх премийĕсене панă. Кăçал вĕсене 7-ĕн тивĕçлĕ пулнă. Конкурса пĕтĕмпе 30 ĕç тăратнă.
Çулталăк тăршшĕнче вĕренÿ учрежденийĕсенче пултарулăх, практика, теори конкурсĕсем 20 ытла ирттереççĕ, вĕсене 30 пин ытла ачапа çул çитмен çамрăк хутшăнать. Вăйăсен пĕрремĕш тапхăрĕн /шкулсем, училищĕсем, техникумсем/ çĕнтерÿçисем районсенчи тата хуласенчи финалсенче ăмăртаççĕ /5 пине яхăн çын/. Республикăри финалта районсенчи тата хуласенчи 1000-е яхăн çамрăк армеец /çамрăк армеецсен 60 ытла уйрăмĕ/ чи лайăххи пулас тесе тупăшать.
6 кун тăршшĕнче ачасем чăрмавсене çĕнтерес, стройпа утас, туризм, шывра ишес енĕпе зачетсем параççĕ. Теори пĕлĕвĕсене компьютер тăрăх тест ирттерсе тĕрĕслеççĕ. Делегацисен ертÿçисем /çамрăк армеецсен уйрăмĕсен ертÿçисем, ОБЖ, физкультура педагогĕ-преподавателĕсем/ валли «Учитель-наставник» конкурс программи ирттереççĕ.
Вăйăсене хутшăнакансене тата хăнасене ЧР ШĔМĕн ятарлă отрячĕ саламланă. Вăл кăтартуллă ăмăртусем йĕркеленĕ.
Олег Макаров пухăннисене ăнăçу, çирĕп сывлăх, палăртнă тĕллевсене пурнăçлама суннă. Палаткăсен хулине пăхса çаврăннă. Ачасем ашшĕ-амăшĕпе хутшăнма пултарччăр тесе веб-камера вырнаçтарма сĕннĕ.