Пăрачкав районĕнчи Напольное салинче мордва халăх пултарулăхĕн «Арта» фестивалĕ çирĕммĕш хут пуçтарăннă. Хăйне майлă юбилее районти Сыреç, Рындино ялĕсенчи ирçесем, çавăн пекех Улатăр районĕнчи тата Мордва Республикинчи Ардатово районĕнчи йăхташĕсем хутшăннă.
Уява ытти çул сала çывăхĕнчи уçланкăра йĕркеленĕ, кăçал вăл çанталăка пула культура çурчĕ умĕнче, ятарласа тунă.лапамра, иртнĕ.
Уява Чăваш Енри мордва культура центрĕн председателĕ В.Седойкин уçнă. «Артăн» ырă йăли-йĕркипе вырăнти ял тăрăхĕн пуçлăхĕ Н.Владимиров паллаштарнă. Ял çыннисемпе хăнасене çавăн пекех Пăрачкав район пуçлăхĕ Л.Васильев, район администрацийĕн пуçлăхĕ Е.Лебедев, ЧР Культура министерствин пай пуçлăхĕ М.Краснов, республикăри наци культура пĕрлĕхĕсен ертÿçисем В.Буйницкий /белоруссен/, М.Лавин /еврейсен/, В.Лукьянов /ЧНК президенчĕн пулăшуçи/, С.Живчиков /казаксен/ саламланă.
Уявра ирçе ялĕсенчи сумлă, хисеплĕ ватăсемпе хастар çамрăксене чысланă - Напольное ял тăрăхĕн Хисеп грамотипе тата мордва культура центрĕн Тав çырăвĕпе наградăланă, парнесем панă.
Кашни халăхăн хăйĕн культурипе йăли-йĕркине сыхласа хăварнин тата ăна малалла аталантарнин пĕлтерĕшĕ пирки Мордва Республикин наци политики енĕпе ĕçлекен министрĕ А.Лузгин тата мордва халăхĕн регионсен хушшинчи общество юхăмĕн секретарĕ И.Карпов сăмах каланă.
Фестивале малалла юрă-кĕвĕ ăстисем тăснă - Напольное культура çурчĕ çумĕнчи «Эрзянка» халăх ансамблĕ, Пăрачкав районĕн культура çурчĕ çумĕнчи «Поречанка» халăх коллекгивĕ, Ардатово районĕнчи Баево ялĕнчи «Пизелне» тата Улатăр районĕнчи Алтышевăри «Лейне» ушкăнсем.
Г. Надина.