2011.06.25 Савăнатпăр пĕр кĕрекере (Чăваш хĕрарăмĕ)

Пĕр-пĕринпе килĕштерсе пурăннине кашни чĕлхепе расна сăмахпа ăнлантарма пулать, анчах тĕшши - пĕрре. Чăваш Республикин наци-культура пĕрлĕхĕсен пултарулăх ушкăнĕсен “Туслăх кăшăлĕ” X фестивальне хутшăнакансем ояксчи, шолом, дуслык, барекамуцюн пĕлтерĕшне никамран лайăх пĕлеççĕ. Тĕрлĕ наци çынни туслă пурăннăран республика, çĕр-шыв, тĕнче вăйлă.

Фестивале уçнă май уява пуçтарăннисене ЧР культура министерствин пай пуçлăхĕ Михаил Краснов, Шупашкарти Мускав район администрацийĕн пуçлăхĕ Андрей Петров саламларĕç, ăнăçупа çитĕнÿ сунчĕç.

Кунти халăх пĕр кĕрекере савăнни киленÿ кÿрет.

Комсомольски районĕнчи “Мишар” ушкăн çамрăк тата аслă ăрăва пĕрлештерет. Тутарсем чăвашла саламлани килĕшÿллĕ те вырăнлă. Унтан Пăрачкав районĕнчи “Эрзянка” ушкăн сăмах илчĕ. Ирçе халăхĕн пултарулăхĕпе паллаштарчĕç вĕсем. Республика тулашĕнчен килнĕ хăнасем те умлă-хыçлăн сцена çине тухрĕç. “Туслăх кăшăлĕ” çулсерен çирĕпленсе те сарăлса пыни курăнать.