Шупашкарти IV экономика форумĕ «МТВ-Центрта» ĕнер малалла ĕçлерĕ, «çавра сĕтелсем» иртрĕç. Пĕрне - «Биотехнологи - «çĕнĕ экономика» аталанăвĕн наци приоритечĕ» темăна халалланине - Ю.А.Овчинников ячĕллĕ Пĕтĕм Раççейри биотехнологсен обществин президенчĕ Раиф Василов профессор ертсе пычĕ. Пĕрремĕш ыйтупа - «Биотехнологи аталанăвĕн регион программисене йĕркелес уйрăмлăхсем тата пĕтĕмĕшле принципсем» - вăлах сăмах каларĕ.
Иртнине пĕлмесĕр общество малашлăхне уçăмлăн палăртаймăн теççĕ. Биотехнологи пирки вун-вун çул каяллах калаçма тытăннă. 2003 çулта Раççейри биотехнологсен обществине йĕркеленĕ хыççăн вăл аталанса çитнĕ тăваттăмĕш тапхăра кĕнĕ. Çĕнĕлĕхе Чăваш Ен ырласа йышăннă. Республикăра биотехнологи мелĕпе тирпейлекен производствăсене вырăнти ял хуçалăх таварĕпе усă курса аталантарма юлашки çулсенче пĕтĕм инфратытăм майĕсене туса хунă.
Тăван республика биорегион, çак наука çул-йĕрĕн пĕлтерĕшлĕ центрĕ пулса тăрса стратеги аталанăвĕн приоритечĕсене суйласа илнĕ. Кунта, паллах, Чăваш Енĕн вăйлăрах конкурентлă енĕсене, социаллă пурнăçпа экономика тата инноваци вăй-хăватне шута хунă. Пурăна киле агропромышленноç комплексĕнче, пурăнмалли çурт-йĕрпе коммуналлă хуçалăхра, сывлăх сыхлавĕнче тата ытти сферăра хальхи вăхăтри биотехнологисене анлăн ĕçе кĕртĕç. Чăваш Республики ку енĕпе ытти регионтан чылай маларах пырать. Çавăнпах экономика форумĕнче çак ыйтăва тĕп темăсенчен пĕри тесе палăртрĕç.
Чăваш Ен тĕслĕхĕпе Тутарстан, Киров, Эрĕнпур тăрăхĕсем тата темиçе регион хăш-пĕр енпе çитĕнÿсем тăваççĕ. «Раççейри вун-вун завод нанотехнологи, «Роснано» корпораци ыйтăвĕсене пурнăçлать. Вĕсем, тĕпрен илсен, бизнеса пула аталанаççĕ», - терĕ Раиф Гаянович.
Малта пыракан регионсем - Чăваш Енпе Тутарстан - биотехнологи программине пăхса тухса çирĕплетнĕ ĕнтĕ, ыттисенче вăл йĕркеленет кăна-ха.
«Роста» ООО /Хусан/ генеральнăй директорĕ Феликс Аухадеев «Ÿсен-тăран чĕр таварĕпе каяша комплекслă майпа биотехнологилле тирпейлесси», Чăваш патшалăх ял хуçалăх академийĕн ăслăлăх тата инноваци енĕпе ĕçлекен проректорĕ Михаил Ершов «Чĕр чунсен шыçă чирĕпе кĕрешмешкĕн профилактика ĕçĕсем ирттерме тата сыватма биопрепаратсем туса хатĕрлесси», «Киров облаçĕнчи биотехнологи кластерĕ» коммерциллĕ мар ĕçтешлĕх президенчĕ Валерий Туруло «Киров облаçĕн тĕслĕхĕнче - ку чухнехи биотехнологи аталанăвĕ», Пĕтĕм Раççейри биотехнологсен обществин Чăваш Енри уйрăмĕн председателĕ Иван Селиванов профессор «Хальхи обществăри биотехнологи наукин приоритечĕсем» темăсемпе докладсем турĕç. Вĕсен шухăшĕпе - пĕлсе усă курсан улăмран та тĕрлĕ биопродукт хатĕрлеме май пур. Йăлари хытă каяшран, куллен пухăнакан çÿп-çапран ĕçе кĕртсе тирпейленĕ, «иккĕмĕш пурнăç» панă хыççăн усă курма юрăхлă таварах пулать иккен. Ку енĕпе ятарлă программа йышăннă. ПС-1, ПС-2 препаратсем выльăхсене чир-чĕртен сыхлаççĕ, продукци тухăçлăхне ÿстереççĕ, хăвăрт çитĕнме пулăшаççĕ.
Валентин Григорьев.