Ĕнер ЧР Президенчĕ Михаил Игнатьев Республика кунне халалласа Çĕрпÿ районĕнче ирттернĕ мероприятисене хутшăнчĕ.
Ку тăрăхра Республика кунĕ ячĕпе çулленхи “Уй кунĕ” курав йĕркелесси йăлана кĕнĕ. Аграри форумне Раççейĕн 15 регионĕн специалисчĕсем, ял хуçалăхĕн инноваци техникипе тата оборудованийĕпе, вăрлăхпа, ÿсен-тăран хÿтĕлевĕн им-çамĕпе, минерал удобренипе тивĕçтерекенсем федерацин Атăлçи регионĕнчен йышлăн пуçтарăннă. Куравра - 100 ытла хальхи машина.
Экспозицие уçнă май Михаил Игнатьев Çĕрпÿсене, унăн хăнисене уяв ячĕпе саламларĕ, “Уй кунĕ” пĕр-пĕрин опычĕпе паллашмалли вырăн тата ытти регион партнерĕсемпе ĕçлĕ çыхăну йĕркелемелли мел пулнине палăртрĕ. “Йăлана кĕнĕ çак курав поставщиксене хальхи техникăна халăх умне кăларма, ял хуçалăх таварĕ тăвакансене вара хăйсен машинăпа техника паркне тĕреклетме пулăшать.
Çĕнĕ тракторсемпе, сеялкăсемпе, ытти агрегатпа усă курса çухатусене чакарма пулать”, - терĕ Президент. Пĕлтĕрхи шăрăх çанталăкра выльăх-чĕрлĕх валли кирлĕ чухлĕ утă-улăм хатĕрлеймен. Кăçал апатлăх культурăсем парка çитĕнеççĕ. Апла тăк 2 çуллăх саппас тума та пулать, тĕш тырă вăрлăхне çителĕклĕ хатĕрлемелле - çакăн пек тĕллев лартрĕ Михаил Игнатьев ял ĕçченĕ умне, АПК тытăмне патшалăх малашне те пулăшасса шантарчĕ.
Президент экспозицири техника шанчăклăхне, хальхи комбайнсемпе ĕçленин эффективлăхне уçăмлатас шутпа Раççейре тата Германире кăларнă комбайнсен штурвалĕ умне хăй ларчĕ. “Ку техника чăннипех хăтлă”, - терĕ вăл ял хуçалăх предприятийĕсен ертÿçисене вĕсене туянма сĕнсе.
Паллах, тырă-пулă ăнса пулмарĕ тĕк хăватлă техника тухăçа ÿстереймĕ. Çĕрпÿсен вара кĕр тыррисен пуссисем уйрăмах парка çитĕнеççĕ, куçа савăнтараççĕ. Президент Раççей ял хуçалăх академийĕн “Колос” предприятийĕн уйĕсемпе паллашрĕ, вĕсене пысăк хак пачĕ.
Республика кунĕ ячĕпе Çĕрпÿсене пысăк парне кÿчĕç - кунта ял хуçалăх пасарĕ уçăлчĕ. Ăна çулталăкрах туса лартнă. 240 тăваткал метр лаптăкра 10 павильон халăха апат-çимĕçпе тивĕçтерме тытăнчĕ. Промышленноç таварĕсемпе тепĕр иккĕшĕ сутă тăвать. Ял хуçалăх çимĕçĕ валли те сентресем йĕркеленĕ. Михаил Игнатьев суту-илÿ речĕсемпе çÿрерĕ, хăйсен хуçалăхĕнче çитĕнтернĕ çимĕçе сĕнекенсен, ăна туянакансен кăмăл-шухăшĕпе паллашрĕ.
...Республика кунне Çĕрпÿре чаплă лару-тăрура уçрĕç: район çыннисемпе хăнисем пултарулăх коллективĕсен театрализациленĕ концертне, “Раççей çăл куçĕсем” фестивале килнисен юрри-çеммипе савăнчĕç. Ярмăркка тÿремĕнче “Манăн Республика кунĕ” фотокурав чылайăшне тыткăнларĕ. “Этнографи ялĕпе” - районти ял тăрăхĕсен экспозицийĕсемпе Президент кăмăллăн паллашрĕ, “Ылтăн алăсем” куравра халăх ăстисен ĕçне тыта-тыта пăхса хакларĕ.
“Паян сирĕн хутлăхра Аслă Раççейĕн чылай кĕтесĕнчен хăна-вĕрле пуçтарăнчĕ. Нумай нациллĕ Чăваш Ен килĕшÿре, çураçура туслă пурăннине çирĕплетекен тĕслĕх çакă, - палăртрĕ Президент. - Чăваш Республикин тĕп уявне хăйсен патĕнче ирттерме Çĕрпÿсем социаллă пурнăçпа экономика аталанăвĕн çитĕнĕвĕсене кура тивĕçнĕ”.
Президент Чернобыль АЭСĕн катастрофине пĕтерме хутшăннисене, ял хуçалăх ĕçченĕсене патшалăх наградисем пачĕ. II степень «Тăван çĕр-шыв умĕнчи тава тивĕçлĕ ĕçсемшĕн» орден медальне Иван Михайлов тата Николай Скворцов, «Чăваш Республикин тава тивĕçлĕ механизаторĕ» ята Петр Григорьев тивĕçрĕç. Нумай ачаллă Никифоровсен, Ершовсен, Кузьминсен çемйине Михаил Игнатьев çĕр лаптăкĕпе тÿлевсĕр усă курма сертификатсем пачĕ, ывăл-хĕрне велосипед парнелерĕ. Николай Кадикин тата Инга Иванова çамрăк специалистсем çурт-йĕр çавăрма социаллă тÿлев сертификачĕ илчĕç.
Михаил Игнатьевпа РФ Патшалăх Думин комитет председателĕ Константин Косачев Тихвин ярмăрккинче пулчĕç, сутуçăсен таварĕпе паллашрĕç. Елена Владимирова Президента пир тĕртес ăсталăх пирки тĕплĕн ăнлантарчĕ. Сăмах май, кинемей кăçал 83 çул тултарнă.
«Тихвин ярмăрккине пĕчĕкренпех асра тытатăп. Вăл яланах шавлă иртет, тĕрлĕ çĕрти халăха илĕртет. Вăл район тата республика экономикине аталантарма май паракан паллă пулăм», - терĕ Президент ял тăрăхĕсенчен кашнийĕн хăйĕн ÿсĕм çул-йĕрĕ пулмаллине палăртса.
Ярмăркка хăнисем чăваш çимĕçĕпе сăйланчĕç, тавар туянчĕç, юрă-кĕвĕпе савăнчĕç. Словаки Республикин Раççейри чрезвычайлă тата полномочиллĕ посолĕ Йозеф Мигаш Тихвин ярмăрккинче пулнă май пирĕн халăхăн йăли-йĕркине пысăк хак парса чăваш хутлăхне тăтăшах килес килнине, чунĕ туртнине пĕлтерчĕ.
Валентина Смирнова.