Республика кунĕ паян кăна пулин те унпа çыхăннă мероприятисем маларах пуçланчĕç. Ĕнерхи вун-вун уявран пĕри - " Раççей ăстисем" конкурс - Шупашкарти Чăваш наци музейĕн картишĕнче уçăлчĕ, хăйсен ăcталăхне кăтартма çĕр-шывăн тĕрлĕ кĕтесĕнчен - Дагестан, Пушкăрт, Мари, Мордва, Калмăк, Коми, Тутар республикисенчен, Киров, Курск, Чулхула, Вологда, Иваново, Волгоград, Владимир, Воронеж, Белгород, Ульяновск облаçĕсенчен, Краснодар крайĕнчен - ал ĕç ăстисем килсе çитрĕç. Пĕтĕм Раççей шайĕнче тăххăрмĕш хут иртекен тупă шура хăйсен пултарулăхне кăтартма 75 маçтĕр кăмăл тунă, йĕркелӳçĕсем тĕплĕ тишкерсе хакланă хыççăн 61-шне йыхрав хучĕ ярса панă. Чăваш Енри 24 ăста та Шупашкарсемпе хăнасене тĕлĕнтерме тĕв тунă.
Йăана кĕнĕ кирек мĕнле тупăшуран та çуллен çĕнĕлĕх кĕтетпĕр. Йĕркелӳçĕсем çакна асра тытса кăçалхи конкурса космонавтикăпа çыхăнтарма йышăннă. Чăваш Енрен виçĕ космонавт - Андриян Николаев, Николай Бударин, Муса Манаров – тухнă май кашни ăстан маларах пĕр ĕç хатĕрлеме тивнё. Унсăр пуçне жюри членĕсем ĕнер кунĕпе янтăланă ал ĕçĕсене паян хаклĕç. Чи лайăххисен авторĕсене паха япаласемпе, Дипломпа хавхалантарĕç. Чи хитрине, чи эрешлине ăсталакан вара ЧР Президенчĕн Ми-хаил Игнатьевăн парнине тивĕçĕ.
"Раççей ăстисем" конкурс чăннипех те пуян. Çакă тупăшу сакăр номинаципе иртнипе, тĕрлĕ халăх çынни хăйĕн пултарулăхне кăтартнипе çыхăннă-тăр. Муркаш районăнчи Анаткас Хачăкра çуралса ӳснĕ Ирина Егорова йывăç савăтсене капăрлатать. Çак ăсталăх ăна юнпа куçнă. "Аксар" студире тăрăшакан пикен амăшĕ тĕрлеме кăмăллать, кукамăшĕ пуканесем калăплама, вĕсене тури чăвашсен тумне тăхăнтарма хапăллать. Пиччĕшĕсем те çак ĕçрен айккинче тăрса юлмаççĕ - Ирина валли йывăçран хатĕрсем касса кăлараççĕ. И.Я.Яковлев ячĕллĕ ЧППУн ӳнерпе графика факультетĕнчен вĕренсе тухнăскер çуллă сăрăпа ӳкерме те маçтăр.
Етĕрне районĕнчи Вăрманкас Асламасра çуралса пĕве кĕнĕ Валентина Поповăн та чун туртăмĕ аслисенчен куçнă ахăр. Ашшĕ йывăçран тĕрлĕ эреш касса кăларнине, карçинкка тавраш çыхнине вăл çăвар карсах пăхнă. Халĕ тĕп хуламăрта пурăнаканскер пушă вăхăтра ахаль лараймасть – тăмпа усă курса çын кӳлеписем çыпăçтарать. Тĕнче уçлăхĕпе çыхăнтарса çав тери ĕнентерӳллĕ сюжет калăпланă вăл: ашшĕне ыталанă ывăлĕ тӳпенелле тинкерсе космонавт пулассине пĕлтерет.
Волгоград облаçĕнчен килнĕ Анна Баженовăпа Евгения Назарова пушшех тĕлĕнтерчĕç – вĕсем тĕрлĕ калăпăшлă, эрешлĕ пĕремĕксене илемлетеççĕ. Пылак çимĕç мар, тетте тейĕн. Халăх искусствин центрĕнче тăрăшаканскерсем курма пынисене ĕç вăрттăнлăхĕсемпе паллаштарчĕç, тутанса пăхма сĕнчĕç.
Конкурса паян пĕтĕмлетĕç, çĕнтерӳçĕсене " Раççей çăл куçĕсем" фестивальте чыслĕç.
Дмитрий Моисеев.