2011.06.24 Аслă шкул, бизнес ыйтăвĕсем тавра (Çамрăксен хаçачĕ)

Ĕнер Шупашкарти IV экономика форумĕн программипе килĕшӳллĕн. «Çĕнĕ вăхăт – çĕнĕ сăнсем» çамрăксен форумĕ иртрĕ. Унта хут-шăнма кăмăл тунисем 3 секцире ĕçлерĕç. И.Н.Ульянов ячĕллĕ ЧПУра регион шайĕнче инженерипе экономика кадрĕсене хатĕрлес ыйтăва сӳтсе яврĕç. Университет ректорĕ Всеволод Агаков салам сăмахĕнче: «Кашни аслă шкултан вĕренмелли пурах. Эпир инновациллĕ, малалла талпăнма хистекен меслетсемпе «хĕç-пăшаллансан» тин пысăк ăсталăхлĕ специалистсене хатĕрлесе кăларăпăр», - терĕ.

ЧПУи вĕренӳпе методика управленийĕн ертуçи Евгений Николаев университет III ăрури çĕнĕ вĕренӳ стандарчĕсене куçнин опычĕпе паллаштарчĕ. Профессор çакна тумашкăн кăткăс пулнине пĕлтерчĕ. Çапах Евгĕний Николаев çĕнĕ вĕренӳ стандарчĕсен тухăçлăхĕнче иккĕленмест. Владимир Щедрин профессор технологин çĕнĕ кадрĕсене хатĕрлес ыйтăва çĕклерĕ. Техника ăслăлăхĕсен докторĕ аслă шкулсен регион, çĕр-шыв экономики, бизнесĕ епле аталаннине пĕлме тивĕçлине палăртрĕ, унсĕрĕн вузсем предприятисене юрăхсĕр специалистсене кăларĕç. Секци çĕне тишкерекен экономика, техника факультечĕсен деканĕсемпе вĕсен çумĕсем унăн сăмахĕпе килĕшрĕç. Шупашкарти электромеханика колледжĕнче «Вăтам тата пуçламăш професси вĕренĕвĕн-регион экономикин çĕнетӳ тапхăрĕнчи вырăнĕ», регионсен хушшинчи суту-илӳпе курав центрĕнче «Стратеги - 2020: бизнеспа вĕренӳри пахалăхпа инноваци: концепцисем, ыйтусем, йышăнусем» секцисем ĕçлерĕç.

Ольга Калитова.