Республика кунне халалласа Шупашкарти регионсен хушшинчи суту-илÿпе курав центрĕнче XVIII “Регионсем - пĕр-пĕринпе килĕштерсе ĕçлесси” курав уçăлчĕ. ЧР Президенчĕ Михаил Игнатьев унта 10 сехетченех çитрĕ. Çĕр-шыв экономикин тĕрлĕ тытăмĕнчи организацисен хушшинчи çыхăнăва аталантармалли лапам республика сăн-пичĕ пулса тăчĕ.
Курав çĕртме уйăхĕн 23-26-мĕшĕсенче ĕçлет. Унăн экспозицийĕсем МТВ-центрăн 5-мĕш хутĕнче ултă пин тăваткал метр ытла йышăнаççĕ. Куравăн тĕп пайĕсем: электротехника, строительствăпа архитектура, транспортпа çыхăну, хими, апат-çимĕçпе тирпейлекен промышленноç, сывлăх сыхлавĕ, приборсем тăвасси, машиностроени, халăха кирлĕ таварсем, наукăпа вĕренÿ, спортпа туризм. Президент сентресем çинчи таварпа интересленчĕ, ертÿçĕсене тĕрлĕ ыйтупа канăçсăрлантарчĕ. Муркаш чăх-чĕп фабрикин çимĕçĕсене тытса пăхрĕ. “Юрма” агрохолдинг куравĕ патне çитсен кăвакалăн сап-сарă чĕпписене алла илчĕ те: “Куратăр-и: вĕсем пире паллаççĕ, мĕншĕн тесен эпир ял хуçалăх отрасльне юрататпăр”, - терĕ. Михаил Васильевич “Ольдеевская” агрофирма помидор-хăярне мĕн хакпа тата хăш лавккасенче сутнипе интересленчĕ. Кăçалхи пыла тутанчĕ. Чăваш Енри çупа сыр бази хатĕрленĕ сĕтел патĕнчен иртсе кайнăччĕ, анчах каялла çаврăнчĕ те мороженăй сентри патне пычĕ. “Акă эпĕ рекламăланипе хамăр кăларакан продукци халĕ чылай лавккара пур. Унччен маларах çак мороженăя тăватă хутчен шырарăм. Ниçта та çукчĕ”, - терĕ. “Чăваш бройлерне” те хастартарах ĕçлеме хушрĕ. Курава хутшăннă 21 район презентацийĕ кăсăклă иртрĕ, Михаил Васильевич ертÿçĕсене ĕçре ăнăçу сунчĕ. “Акконд-агро” сĕтне астивсе мухтанă хыççăн тепĕр хута хăпарчĕ. Унта инноваци, нанотехнологи аталанăвне сăнлакан техника хатĕрĕсем, тумтирсем кăларса тăратнă.
“Регионсем - пĕр-пĕринпе килĕштерсе ĕçлесси” куравра пĕчĕк тата вăтам бизнесăн ушкăнпа янтăланă уйрăм экспозицийĕсемпе те, халăх ÿнер промыслисен ăстисен хатĕрĕсемпе те, экономикăн тĕрлĕ тытăмĕнчи çĕнĕлĕхсемпе те паллашма май пулĕ. Раççейĕн 10 регионĕнчи промышленноç предприятийĕсен, наука организацийĕсен тата учрежденийĕсен ертÿçисем, ют çĕр-шыв представителĕсем Чăваш Ене çитрĕç. Тĕрлĕ фирма хăйĕн таварĕпе, ĕçĕ-хĕлĕпе паллаштарчĕ. Вĕсем туса кăларакан апат-çимĕçе тутанса пăхма та май пулчĕ.
Регина Кубайкина.