Регионсен пĕрлехи “Регионсем - чикĕсĕр ĕçтешлĕх” куравĕ тахçанах Чăваш Республикин хăйне евĕрлĕ бренчĕ, çĕр-шыв экономикин тĕрлĕ отраслĕнчи организацисен хушшинчи вăрахлăх çыхăнусем йĕркелемелли площадка пулса тăнă ĕнтĕ. Кăçал вăл Шупашкарти IV “Раççей экономики: ÿсĕм технологийĕсем” экономика форумĕн программипе килĕшÿллĕн çĕртме уйăхĕн 23-26-мĕшĕсенче иртет. Унăн экспозицийĕсем МТВ-центрăн 5-мĕш хутĕнче ултă пин тăваткал метр ытла лаптăк йышăнĕç.
Куравăн тĕп пайĕсем: машиностроени, электротехника, приборсем тăвасси, строительствăпа архитектура, транспортпа çыхăну, хими, апат-çимĕçпе тирпейлекен промышленноç, сывлăх сыхлавĕ, наукăпа вĕрентÿ, банксемпе страховани, спортпа туризм, халăха кирлĕ таварсем. 2011 çулта Чăваш Республикинчи 21 предприяти хăйсем çуралнине - юбилейсене - паллă тăвать, çавна май вĕсем хăйсен çитĕнĕвĕсемпе уйрăмах анлăн паллаштарĕç. Чăваш Енри монохуласен /Çĕнĕ Шупашкар, Улатăр, Канаш, Çĕмĕрле, Етĕрне, Сĕнтĕрвăрри/ тата республикăри мĕн пур 21 район презентацийĕсем уйрăмах кăсăклă пулмалла. Куравра пĕчĕк тата вăтам бизнесăн ушкăнпа хатĕрленĕ уйрăм экспозицийĕсемпе те, халăх художество промыслисен ăстисен изделийĕсемпе те, экономикăн тĕрлĕ сферинчи çĕнĕлĕхсемпе те паллашма май пулĕ.
Курав вăхăтĕнче “çавра сĕтелсем” тата çамрăксен “Çĕнĕ вăхăт - çĕнĕ сăнсем” форумĕ пулĕç. Курава хăнасем йышлăн килмелле: официаллă çынсем, бизнесменсем, Раççей Федерацийĕн 10 регионĕнчи промышленноç предприятийĕсен, наука организацийĕсен тата учрежденийĕсен ертÿçисем, ют çĕр-шывсен представителĕсем. Тĕрлĕ фирма хăйсен таварĕсемпе, пулăшу ĕçĕсемпе паллаштарĕ, дегустаци лаптăкĕсем ĕçлĕç, унта наци апат-çимĕçне ас тивме те май пулĕ. Сутлăха ютран кÿнине кăна мар, вырăнти продукцие те кăлараççĕ. Республикăра пурăнакансем çеç мар, кÿршĕ регион çыннисем те курава тÿсĕмсĕррĕн кĕтеççĕ - таварсене хушма хаксăр, вĕсене туса кăларакансен хакĕпе, туянасшăн.
Надежда Смирнова.