Тутар Республикинче те, Раҫҫейĕн чылай регионӗнчи пекех, наци йӑли-йĕрки вӑй илсе пырать. Ҫĕпрел районĕнче иккӗмӗш ҫул Акатуй ирттереҫҫĕ. Кӑҫал вӑл патшалӑх уявӗпе - Раҫҫей кунĕпе - тата Ҫимĕкпе /Ҫветтуй Троицӑпа/ пĕр килнĕ.
Ҫӗпрел районӗнче пурӑнакансенчен 40 ытла проценчӗ - чӑвашсем. Район Акатуйне пӗлтӗр Саплӑк ял тӑрӑхӗ йышӑннӑччӗ, кӑҫалхи Хулаҫырми ялӗнче иртрӗ. Ҫитес ҫул тепӗр ял тӑрӑхӗ йӗркелӗ.
Хулаҫырми ялӗнчи уява Чӑваш Республикипе Чĕмпĕр облаҫӗнчи, ытти регионти хӑнасем те хутшӑнчӗҫ. Кӑҫалхи Акатуй кураторӗ - район администрацийӗн пуҫлӑхĕн ҫумӗ Александр Шадриков. Район пуҫлӑхӗн Тимур Нагумановӑн шухӑшӗпе - хӑйне хисеплекен халӑх несӗлӗсен аваллӑхне лайӑх пӗлмелле тата пархатарлӑ йӑла-йӗркене пулас ӑрусем валли хӑвармалла.
Наци культурине аталантарас тӗлӗшпе ытти ӗҫ те пурнӑҫлаҫҫӗ. Культура ҫурчӗсемпе клубсенчен чылайӑшӗнче фольклор ушкӑнӗсем йĕркеленӗ. Культурӑна упраса хӑварас тата аталантарас тӗлӗшпе ятарлӑ программа ӗҫлет. Унӑн чи лайӑх «ҫимӗҫӗсемпе» вара Акатуйра тӗплӗн паллашма май килчӗ. Кусем - халӑх ӑстисен ӗҫӗсем, апат-ҫимĕҫ, ҫи-пуҫ... Куракансене савӑнма - юрӑ-ташӑ, вӑйӑ-кулӑ -савӑнӑҫлисем, хаваслисем...
Уявӑн тӗп сцени ҫинче - майданра - кӗрешекенсем, каҫӑ урлӑ сикекенсем, ытти енӗпе вӑй виҫекенсем валли те вырӑн тупӑнчӗ. Юлашки ҫулсенче Ҫӗпрелсем наци кӗрешӗвӗ енӗпе Раҫҫей шайӗпех палӑраҫҫӗ. Амӑрту йӗркелӳҫисем - Чӑваш Ен спортсменĕсем, «Кӗрешӳ» федераци тренерĕсем. Кӑҫалхи уяв, Тутарстан чӑвашӗсен социаллӑ пӗлтерĕшлӗ ытти проекчĕ пекех, Николай Угаслов меценат /Шупашкарти «Тус» строительство фирмин генеральнӑй дирекгорӗ/ пулӑшнипе иртрӗ. Сӑмах май, вӑл Хулаҫырминче ҫуралса ӳснӗ.
Акатуя Чӑваш Енри артистсем -пӗр тӑван Малинасем, Светлана Яковлева, Алексей тата Андрей Шадриковсем, Петр Ермолаев, ыттисем - илем кӳчӗҫ.
А.Николаев.