2011.06.10 Акатуйсăр юлмĕ (Хыпар)

Республика Кунĕ çывхарать. Чăваш Ене ытти çулти пекех Раççейĕн тĕрлĕ кĕтесĕнчен, ют çĕр-шывсенчен хăнасем килĕç, мероприятисене хутшăнĕç. Çавăн пекех чăвашсен Акатуйне те пухăнĕç.

Акатуй çĕртме уйăхĕн 24-мĕшĕнче тĕп хуламăрти «Шупашкар: 500 çул» паркра иртĕ. Унта яланхи пекех культура, спорт мероприятийĕсем пулĕç. Пушкăрт, Тутар республикисенче, Самар, Пенза, Ульяновск, Чулхула облаçĕсенче, Мускавра тĕпленнĕ йăхташăмăрсем хăйсен пултарулăхĕпе савăнтарĕç. Паттăр арсем чăваш кĕрешĕвне хутшăнĕç, кире пуканĕ йăтĕç, волейболла тата ытти вăйă вылĕç.

Чăваш наци конгресĕн президенчĕ Геннадий Архипов палăртнă тăрăх - Акатуя Раççейри йăхташăмăрсем тĕпленнĕ 12 регионтан килме кăмăл тунă ?хальлĕхе%. Уяв кунĕнче Чăваш патшалăх гуманитари ăслăлăхĕсен институтĕнче «çавра сĕтел» иртĕ. Унта чăваш наци культура автономийĕсен ертÿçисем чăвашлăхпа çыхăннă ыйтусене сÿтсе явĕç. Каçхине вара, 20 сехетре, Чăваш наци конгресĕн çурчĕ умĕнче эстрада юрăçисем концерт кăтартĕç.