2011.06.09 Çĕрпÿсем уява хатĕрленеççĕ (Хыпар)

Олег Макаров премьер объектсене Республика кунĕ тĕлне мĕнле хатĕрленине тĕрĕслес тĕллевпе Çĕрпÿ районĕнче пулнă.

Çĕрпÿ-Рынкă хутлăхĕнче автоçул тăвас ĕç-хĕлпе паллашнă. Кунта пĕр километр ытла сыпăка çĕнĕ асфальт сарнă, тротуарсем хатĕрлеççĕ. Райадминистраци пуçлăхĕ Юрий Николаев пĕлтернĕ тăрăх Çĕрпÿре те тротуарсем сараççĕ - пĕтĕмпе тăватă километр ытла пулмалла. Уяв тĕлне вĕçлесшĕн.

Актай ялĕнче вара «Чăваш бройлерĕ» АУОн чĕпсене çитĕнтермелли комплексне хута ямалла. Кунта та хĕрсех ĕçлеççĕ. М-7 автотрасса хĕрринче, Сăнав поселокĕ патĕнче, республикăн «Уй-хир кунĕ - 2011» курав-демонстрацине вырнаçтарма палăртнă. Кунта çĕре яхăн ял хуçалăх техникипе паллашма май пулĕ. Хальлĕхе таса уйра трасса çинчен анмалли вырăна кăна хатĕрлеççĕ. Олег Макаров ĕçсене васкатмаллине, çумăр çăвас пулсан техникăна ăçта кĕртсе лартасси пирки шухăшламаллине палăртнă. «Органика» ял хуçалăх пасарĕн строительстви тĕлĕшпе ыйту нумай. Ĕç калăпăшĕ пысăк, васкавлăх вара çук.

Республика кунĕн пысăк пĕлтерĕшлĕ объекчĕ - Тихвин ярмăркки. Правительство пуçлăхĕ сцена, суту-илÿ речĕсем мĕнлерех вырнаçассипе кăсăкланнă. Хулан социаллă уйрăм объекчĕсене пăхса çаврăннă. Строительсем уяв тĕлне нумай хваттерлĕ çурт хута яма шантараççĕ, тăхăр çурт фасадне юсаса пĕтермелле. Район шайĕнчи ытти объект та пур. Премьер Республика кунĕ тĕлне пĕтĕм ĕçе вĕçлемеллине палăртнă.