2017.07.10 Çемье – тăнăçлăх вучахĕ

Çемье — татулăх, килĕшӳ.
Вылять йăл-кулă сăн-питре.
Çемье — пĕр шухăшлăх, хăват
Парса тăрать ĕмĕрлĕхе.
Вăл — чĕрери таса сăвап,
Упрать халь пирĕн пĕрлĕхе.
        Чăнах та çемьере килĕшÿ, юрату хуçалансан яланах йăл-кулă сăн питре йăлкăшать, пурнăç чечекĕ илемлĕ çеçке çурать. Кашни çулах июнĕн 8-мĕшĕнче Петрпа Феврони çвятуйсен кунĕнче çемье, юрату тата тăнăçлăх уявне паллă тăваççĕ. Çак сăлтавпа Сителти клуба та халăх йышлăн пухăнчĕ. Ялти культура вучахне вăйлăран-вăйлăрах хĕмленме май туса паракан «керменĕн» уяв символĕ– илемлĕ ромашка чечек çиххийĕсем– айне путнă залĕнче курмалли çак кун пайтах пулчĕ. Унта культурара вăй хуракансем йĕркеленĕ мероприятине хитре шурă çеçкесенчен Петрпа Февронин таса та сăваплă ĕçĕсене хисеп туса хăйсен аллипе ăсталанă пуç кăшăлĕсем тăхăннă маттур та пултаруллă ентешĕмĕрсем хастар хутшăнса сумлă та асамлă куна питĕ интереслĕ те кăсăклăн ирттерсе ячĕç.
         Уявра пухăннисем пĕри те ахаль лармарĕç. Кам юрă юрласа, тепри ташă ташласа, виççĕмĕшсем тĕрлĕ конкурссенче хутшăнса савăнчĕç. Çав вăхăтрах шÿтсем каласа култаракансем, чĕрене çывăх сăвăсене чуна çÿçентермелле вулакансем те пулчĕç. Пухăннисене чĕререн тухакан ăшă сăмахсемпе хĕр арăмсен каншĕн ертÿçи, вулавăш ĕçченĕ Оксана Хомуткина тата çак пĕрлешĕвĕн ытти членĕсем Валентина Реймовапа Нина Соколова саламласа яланах пĕрле килĕштерсе пурăнма сунчĕç.
        Кунта килнисенчен кашнийĕшех вĕсемшĕн çемье тăнăçлăх вучахĕ пулса тăнине çирĕплетсе мăшăрĕсемпе ачисем чи-чи хаклине палăртрĕç. Пĕр-пĕринпе килĕштерсе пурăннине нимĕн те çитменнине пĕлтерсе нумай çул мăшăрланса пурăннăскерсем çамрăксене усăллă канашсем парса хавхалантарчĕç.
        Мероприяти пурте пĕр шухăшлăн ташă картинче чун каниччен ура хуçса ташланипе вĕçленчĕ, вăл пурин кăмăлне те çырлахтарма пултарчĕ.