2017.03.13 Ĕç ветеранĕ Иван Егорович 85 çулта

  Паян Сителти Вазенковсен çемьинче савăнăçлă уяв. Кил хуçи Иван Егорович хăйĕн сумлă юбилейне 85 çул тултарнине паллă тăвать. 
     Ăна хисеп туса   Аслă Арапуç ял тăрăхĕнчи централизациленĕ клубсен йертÿçи Р. Ефимова, администраци ĕçченĕсем В. Ильинапа О. Емельянова тата Сителти библиотекарь О. Хомуткинапа культорганизатор И. Лякова саламларĕç, малашне те тулли кăмăлпа пурăнма юман пек çирĕп сывлăх, телей те канлĕ ватлăх сунчĕç. Юбиляра  парнесем парса чысларĕç.

       Иван Егорович 1932 çулта кун çути курнă. Унăн  хăйĕн вăрăм ĕмĕрĕнче  савăнăçпа пĕрлех хуйхи -суйхине те чылай тÿсме тивнĕ. Ачалăхĕпе çамрăклăхĕ йывăр вăрçă çулĕсенче иртнĕ пулсан та каччă шав малалла утма ăнăтăлнă, тăван çĕршывшăн юрăхлă çын пуласчĕ тесе тăрăшнă.  Çапла вăл шкул хыççăн çарта моряк пулса виçĕ çулччен служить тунă.

        Унтан яла килсен ытти ял-йышпа кар тăрса колхоз ĕçне кÿленнĕ. Тивĕçлĕ канăва тухичченех тăван тăрăхшăн тар тăкнă. Нумай çул хушши конюхра тăрăшнă. 
       1957 –мĕш çулта Иван Егорович çак ял пикине Елена Васильевнана качча илнĕ. Вĕсем пĕр-пĕринпе  килĕштерсе пурăннă, виçĕ хĕрпе, виçĕ ывăл пăхса çитĕнтернĕ.

       Халĕ хаклă  юбиляр Николай ывăлĕн çемьипе пурăнать, 9 мăнук тата 12 кĕçĕн мăнук пурришĕн чунтан хĕпĕртет. 
Пурнăçа килĕшÿре пурăнса ирттермелле тет вăл. Пĕр-пĕринпе вăрçăнса, кăмăлсăрланса тăнипе малалла каяймастан тесе ырă канаш парать пире çамрăксене. Чăнах та çапларах тусан çеç Иван Егорович пек 85 çула çитме май пулĕ.