2015.04.01 Беларусси Республикине нимĕç-фашистсенчен хăтарни 70 çул çитнине халалласа Беларусси президент Резиденцийĕнчен килнĕ юбилей медалĕпе тата саламлă çыру парса чысларĕç

         Василий Федорович Ляков 1922 çулта Патăрьел районĕнчи Сител ялĕнче кун çути курнă. Вун çиччĕре чух Тăван çĕр-шывăн Аслă вăрçи пуçланнă. Çак асаплă та хаяр самана унăн тымар яма çеç пуçланă çутă ĕмĕчĕсене пĕтернĕ. Ваççили тете Сăр хĕррине окоп чавма çÿренĕ. Унтан таврăнсан каччă çар ĕç комиссариатĕнчен хут килессе кĕтмен, хăй ирĕкĕпе фронта тухса кайнă. Çапла Сител ялĕн паттăр ывăлĕ 1942 çулхи çу уйăхĕн 5-мĕшĕнчен пуçласа фашистсене хирĕç çапăçма пикенет. Малтан ăна Тула облаçне яраççĕ, кайран Белоруссин пĕрремĕш фронтне куçараççĕ. Унта вăл пушкăпа пенĕ çĕрте наводчик пулса çапăçать. Василий Федорович Брянск хулине, Украинăна, Белоруссие, Польша çĕр-шывне фашистсенчен ирĕке кăларнă çапăçусене хутшăнать. Виçĕ хутчен "За отвагу" медале илме тивĕç пулать.

          2015 çулхи пуш уйăхĕн 30 – мĕшĕнче, Аслă Арапуç ял библиотекинче, Василий Федорович Лякова Беларусси Республикине нимĕç-фашистсенчен хăтарни 70 çул çитнине халалласа Беларусси президент Резиденцийĕнчен килнĕ юбилей медалĕпе тата саламлă çыру Аслă Арапуç ял тăрăх пуçлăхĕ Владимир Секретов тата кунти военком ĕçченĕ Татьяна Васильева парса чысларĕç. Çĕнтерÿшĕн, паянхи мирлĕ пурнăçшăн тав турĕç.

         Василий Лякова вăрăм кун-çул, çирĕп сывлăх, иксĕлми вăй-хал сунатпăр!