|
Пирĕн районта халĕ 6429 ватă. Вăл шутра 1512-шĕ инвалидсем. Ку хисеп вăл паллах сахал мар. Районти социаллă хÿтлĕх пайĕ вĕсем çинчен манмасть. Тăр пĕччен, пĕчĕк пенсипе пурăнакансем те пур. Унашкаллисене адреслă пулăшу та пама тăрăшатпăр. Сăмахран, иртнĕ çул РФ Пенси фончĕ урлă 500-шер тенкĕ уйăрса панăччĕ. Кăçал ваттисен кунне ирттерме асăннă фондран укçа-тенкĕ ытларах уйăрнă: 47 пин тенкĕ. Çав укçаран 10 пин тенки социаллă пулăшу панă çĕре каять, пĕлтĕр вăл сумма 3 пин тенкĕпе танлашнă. Ватăсене хисепе хуракансем пур. Акă, районти линипе техника цехĕ хăйсен пенсионерĕсене кашни çулах материаллă пулăшу парать, пахча-çимĕç комбиначĕ те аякра юлмасть çак ырă йăларан.
Районта виçĕ ваттисен çурчĕ. Элĕк салинче, Шĕмшешре, Вырăс Сурăмĕнче вырнаçнă. Унта 50 çын пурăнать. Вĕсене тытса тăма республика бюджетĕнчен пурĕ 1 миллион та 866 пин тенкĕ палăртнă, бюджетлă мар фондран вара 607 пин те 200 тенкĕ. Ваттисен кунне ирттерессине ял тăрăхĕсем хуçалăх ертÿçисемпе пĕрле хăйсем çине илĕç паллах. Уяв кунĕнче сĕтел хатĕрленисĕр пуçне, культурăлла мероприятисем, тĕрлĕ конкурссем ирттермелле. Пĕр сăмахпа, çав кун кашниншĕн асра юлмалла. Ватлăх хÿтлĕх кĕтнине пирĕн самантлăха та манмалла мар.
|
